#TimorLeste #UNTL #FCS #DCS #DRI #COVID19 #COVID19TL 18 Juñu 2021
Universidade Nacional Timor Lorosa’e (UNTL) nia Dekanu Fakuldade Siénsia Sosiál (FCS) ho nia Visedekanu sira reune ho Estrutura Departamentu Komunikasaun Sosiál (DCS) no Departamentu Relasaun Internasionál (DRI), hodi haree hamutuk preparasaun ba Akreditasaun Programátika ne’ebé sei hala’o iha 2021.
Dekanu FCS nian Profesór Camilo Ximenes Almeida, iha Kampus Kaikoli hateten katak, preparasaun estrutura departamentu no dosente sira liuhusi prienximentu template no dadus sira importante atu salva futuru departamentu nian.
“Prosesu ba avaliasaun husi Ajénsia Nasionál ba Avaliasaun no Akreditasaun Akadémika (ANAAA) nia ekipa prontu atu fasilita, ita iha prienximentu ba template, ha’u haree departamentu rua halo hela, no keta haluhan dadus dosente sira-nian no evidénsia ba atividade sira importante, tanba ne’e presiza servisu ekipa, ho ekipa mak bele”, hatutan Dekanu.
Profesór Camilo mós husu ba dosente sira, atu submete dadus ne’ebé departamentu presiza, atu kompleta iha parte ne’ebé presiza.
Iha fatin hanesan, Diretór DCS nian, Profesór Marcelino Ximenes Magno hateten, preparasaun departamentu nian besik termina ona prosesu prienximentu nian.
“Ami-nia preparasaun dezde 2019, enkontru ho dosente sira hodi prepara dokumentu sira, dosente nian, dadus ensinu no prátika. Aleinde ne’e, ajuda mós husi Profesór Emanuel António Braz, PhD hodi prienxe template, tanba ne’e servisu ekipa durante ne’e la’o di’ak tebes”, tenik Diretór DCS.
Entretantu Diretór DRI nian, Profesór Bernardo Idalina Leto, mós hato’o katak preparasaun la’o hela no sei finaliza template iha semana ida tuir mai.
“Prosesu ne’e la’o hela, liuliu iha prosesu prienxe template ne’e, maibé difikuldade mak iha dadus dosente nian, no dokumentu sira kona-ba prosesu estabelesimentu kursu nian, maibé ekipa esforsu hodi prienxe atu finaliza iha tempu tuir mai”, hatutan Profesór Bernardo.
Iha reuniaun ne’e partisipa husi Visediretór, Dosente no funsionáriu sira. Enkuantu iha diskusaun modera husi Visedekanu Asuntu Akadémiku nian, Profesór Ananias Soares, fahe mós esperiénsia husi eis Diretór Departamentu Dezenvolvimentu Komunitáriu no Inkluzaun Sosiál, atuál Visedekanu Asuntu Estudantil, Profesór Mateus Tilman.
Média UNTL : Miguel Gonçalves
Foto : Miguel Gonçalves, Arkivu DCS