#TimorLeste #UNTL #CFA 21 Maiu 2021
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D, halo abertura ba formasaun aula online utilizasaun ferramenta online nian, faze dahuluk nian ba dosente sira, ne’ebé organiza husi Sentru Formasaun Avansada, iha sala Vídeo Konferénsia UNTL nian, Díli (21/04).
“Agradese tebes, ita bele halo abertura ba formasaun online, rapidamente ba profesór sira, inisiativa furak ita haree ba implementasaun serka-sanitária no Estadu Emerjénsia iha Timor-Leste, liuliu profesór relasiona ho aula online nian, mak liuhusi formasaun ne’e bele ajuda ona sira prosesu aula distánsia”, tenik Reitór.
Reitór mós hatutan, liuhusi atividade hirak ne’e bele moderniza prosesu aprendizajen iha momentu ne’e presiza no koñese mós ferramentu foun teknolojia nian iha tempu atuál.
Iha fatin hanesan, Diretór Sentru Formasaun Avansada
(CFA), Profesór Apolinário Magno, hateten, formasaun refere inisiativa no instrusaun husi Reitór rasik, atu ajuda manorin na’in sira iha situasaun serka-sanitaria nian laran.
“Formasaun ne’e, hanesan parte modernizasaun ensinu distánsia, liuhusi instrusaun Reitór nian, ami realiza ferramente ensinu liuliu ensinu distansia ne’ebé utiliza Google Meeting ho Zoom no seluk tan hodi hakbi’it profesór sira iha ámbitu ida hanesan ne’e sira bele kontinua hanorin”, tenik Diretór CFA.
Diretór mós hatutan, atividade ne’e realiza kolabora mós entre CFA servisu hamutuk ho Diresaun Nasionál Teknolójia no Informasaun (DNIT) UNTL nian no sei kontinua faze tuir mai bainhira faze dahuluk nia remata.
Ba faze dahuluk nia partisipante hamutuk na’in ha’at nulu resin inklui Reitór rasik no nia Formadór iha formasaun ne’e fasilita husi Sr. Gede Jhony.
Média UNTL : Agostinho da Cruz e Silva
Foto : Agostinho da Cruz e Silva