#TimorLeste #UNTL #VRAAGK #DNAE 13 Maiu 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VRAAGK), Profesór Doutór Samuel Venâncio de Sousa Freitas, iha Kampus Sentrál UNTL nian, Díli (10/05) hateten nia Gabinete prepara hela dadus atu hetan subsídiu ba propinas semestre impár 2021 nian no pulsa.
“Governu, liuhusi Ministériu Ensinu Superiór, Siénsia no Kultura (MESSK), atu apoiu subsídiu ba estudante sira liuhusi selu propinas no pulsa ba estudante hotu ne’ebé ativu hela iha UNTL durante implementa Serka-Sanitária (SS), no dadaun ne’e parte Servisu Akadémiku servisu hamutuk ho Fakuldade sira, ita rekolla hamutuk ona dadus estudante sira-nian”, tenik Profesór Samuel.
Profesór Samuel mós hatutan subsídiu propinas ba estudante tuir kustu ne’ebé sira selu ba universidade livre teoria selu de’it U$ 5.00 no sira ne’ebé sei ativu mak selu U$ 30.00, inklui pulsa ba estudante idaidak.
“Subsídiu sei fó mak tuir estudante ida-idak nia kustu pagamentu nian, hanesan sira ne’ebé ativu hela aula, U$ 30.00 no sira ne’ebé livre teoria sei fó U$ 15.00 ne’e ba propinas nian, no pulsa ba telefone hodi uza ba internet kada estudante idaidak”, tenik Visereitór.
Iha parte seluk, Diretór Nasionál Atendimentu Estudante (DNAE), Sr. Rui Pires, hateten dadus ne’ebé sira entrega ona ba Gabinete VRAAGK kompleta ho númeru telefone hamutuk na’in 19.425.
“Sira ne’ebé dadus kompletu ona ho númeru telefone hamutuk na’in 19.425, husi total ne’ebé ativu hamutuk 27.563, sei falta estudante na’in 8.138 mak presiza ita kompleta no atualiza númeru kontatu ativu hodi entrega MESSK. Enkuantu ba sira ne’ebé seidauk iha kompleta ami sei esforsu atu hetan husi estudante sira” tenik Loco.
Média UNTL : Agostinho da Cruz e Silva
Foto : Agostinho da Cruz e Silva