#TimorLeste #UNTL #BRI 06 Abril 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, asina renovasaun kontratu ho Diretór Bank Repúblika Indonesia (BRI) iha Timor-Leste, Sr. Ronald Roho, kona-ba instalasaun ATM (Automated Teller Machine), iha Resintu Kampus UNTL nian, hodi fasilita asesu ba kliente sira.
Iha Sala Vídeo Konferénsia UNTL nian, Díli (06/04), Magnífiku Reitór agradese ba BRI iha Timor-Leste tanba estabelese ATM besik universidade nasionál hodi fasilita kliente sira bele asesu.
“Agradese ba inisiativa ida ne’e, hodi fasilita konsumidór sira, liuhusi instala ATM-BRI besik iha ita-nia kampus, aleinde ne’e, karik iha asuntu balun ne’ebé ita presiza hadia ita bele diskuti iha tempu tuir mai”, tenik Reitór.
Iha fatin hanesan, Diretór Jerál BRI, Sr. Ronald Roho, hateten orgullu tanba bele tau ona sira-nia ATM iha Resintu UNTL nian no fatin ne’ebé sai sentru no estratéjiku.
“Orgullu tebes bele tau ami-nia ATM iha ne’e, tanba ne’e fatin ida estratéjiku tebes aleinde ne’e ami-nia konsumidór balun mós husi UNTL nian bele asesu ho lalais, bainhira hakarak foti osan ho lalais”, tenik Diretór BRI.
Partisipa iha eventu ne’e, Visereitór ba Asuntu Administrasaun Planu, Finansa no Administradór-Jerál, Profesór Helio A. Da Costa Mauquei, Ph.D, Proreitór ba Asuntu Planeamentu, Monitorizasaun no Avaliasaun, Profesór José Nelson Salsinha Ph.D, Diretór Planu no Finansas, Sr. Egídio dos S. Filipe ho nia Xefi Departamentu, Diretóra Nasionál Lojístika no Manutensaun Sra. Fatima O. Monteiro, inklui ekipa husi BRI.
Média UNTL : Agostinho da Cruz e Silva
Foto : Agostinho da Cruz e Silva