Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH,Ph.D entrega ofisialmente lista estudante inativu husi tinan 2000-2012 ne’ebé elimina ona husi Sistema Akadémiku hamutuk na’in 8.850 ba dekanu sira.
Reitór hatete, desizaun final ne’e atu elimina estudante sira ne’ebé la ativu ona iha UNTL, lista sira ne’e entrega ona ba dekanu fakuldade sira, nune’e estudante sira mai atu halo reinskrisaun bele haree fila fali iha lista ne’e, karik naran tama ona iha lista eliminasaun signifika estudante ne’e la hetan ona legalidade.
“Ohin ofisialmente ita entrega ona lista estudante sira ne’ebé ita esklui ona husi sistema akadémiku, nune’e karik estudante sira-ne’e mai fila fali ho dokumentu kompletu mos ita sei la simu ona, nune’e sira hakarak kontinua fali estudu iha UNTL tenke tuir fali prosesu normal hanesan estudante foun sira, tanba ita konsege fó tempu tinan rua hahú husi 2022 -2024”, dehan Reitór iha Gabineti DJAA, kampus Sentrál, Díli (11/03).
Iha fatin hanesan Dekanu Faculdade de Educação Artes e Humanidades (FEAH), Profesór Teodoro Soares hatete, fakuldade simu ne’ebé elimina ona lista, tanba ne’e esklui ona sira husi sistema.
“Ohin ami mai simu ona lista eliminasaun estudante. Kuandu nia hakarak mai fali eskola, tenke tuir prosesu normal hanesan estudante foun, tanba ita fó ona tempu tinan rua, balu konsege mai ona, sira seluk ne’ebé la mai tama ona iha lista eliminasaun”, dehan Dekanu FEAH.
Lista refere prepara husi Diretór Nacional Atendimentu Estudante nian, Sr. Rui Loco ho ekipa, arkiva iha sistema husi Diresaun Nacional Atendimentu Estudante.
Partisipa husi Visereitór VRAAGQ nian, Profesór Samuel Venâncio de Sousa Freitas, Diretór Jerál de Administrasaun Akadémika, Sr. Armindo Leto Fátima, Diretora DNIT nian, Sra. Emancia E. S. Magno, Diretór Nacional ba Avaliasaun Akreditasaun Sr. Agustinho Quelo ho asitente tékniku sira.
Dekanu sira ne’ebé simu lista mak Faculdade de Direito, Profesór José Tomas Alves, Decano Faculdade de Economia e Gestão nian, Profesór Filipe Mendes Pereira, Dekanu FEAH, Profesór Teodoro Soares.
Media UNTL
: Leonia de Araújo da Costa
: Leonia de Araújo da CostaFoto
: Leonia de Araújo da Costa
: Leonia de Araújo da Costa