Universidade Nacional Timor Lorosa'e (UNTL), nia Estudante Remizia da Silva Gouveia Leite, hatete, kuaresma tempu ne'ebé hakmatek hodi halo konversaun no fanun sivitas akadémiku sira hodi hanoin sala sira atu fila-fali ba dalan loos.
"Kuaresma fó hanoin mai ita atu halo konversaun hodi hanoin sala sira, no pontu tolu husi kuaresma maka orasaun, jezum no rekonsiliasaun nune'e husu ita atu hametin vida espiritual liuhusi orasaun loron-loron nian", tenik Remizia iha Kapela UNTL São João Paulo II Hera, Díli (05/03).
Nia hatutan, iha tempu kuaresma hanesan estudante presiza prepara aan ho di'ak nune'e bele sai foinsa'e ne'ebé di'ak, nomós husu ba sívitas akadémika hotu, presiza reflete aan, saida mak halo ona no seidauk presiza hadia hodi sai matadalan Kristu nian ba ema hotu.
Iha fatin hanesan Proreitora Asuntu Provedoria no Akonsellamentu (PRAPA), Profesora Teresa de Jesus Vaz Cabral, hateten tempu kuarezma durante loron 40 tanba ne’e presiza halo jezum, orasaun no asaun karitativa ba maluk sira.
"Tempu kuarezma durante loron 40 atu fó hanoin hikas ita kona-ba Na'i Jesus Kristu nia moris no enkarna moris hamutuk ho ita, nune'e husu ba sívitas akadémika UNTL tomak mai ita hamutuk halo reflesaun nu'udar ema maksalak no hakribi sala hodi Na'i Jesus bele perdua sala no lori ita ba dalan loos", Dehan Proreitora.
Média : Denilson Amandio Barros
Foto : Leonia de Araújo