𝐔𝐍𝐓𝐋-𝐅𝐀𝐆𝐑𝐈 𝐑𝐄𝐀𝐋𝐈𝐙𝐀 𝐌𝐈𝐒𝐀 𝐀𝐁𝐄𝐑𝐓𝐔𝐑𝐀 𝐁𝐀 𝐈𝐍𝐈𝐒𝐈𝐔 𝐓𝐈𝐍𝐀𝐍 𝐋𝐄𝐓𝐈𝐕𝐔 𝟐𝟎𝟐𝟓

Universidade Nacional Timor Lorosa’e (UNTL) nia Faculdade de Agricultura (FAGRI) realiza misa abertura ba tinan letivu 2025, iha Kampus Hera, Díli (14/02), hodi husu mós bensaun ba edifísiu foun FAGRI nian antes hahu atividade fakuldade nian.

 

Dekanu FAGRI Prof. Vicente de Paulo Correia hatete, sira realiza misa ne’e, tanba antes hahú aula nomós halo fraternizasaun entre dosente, funsionáriu no estudante sira.

“Ami organiza misa, tanba razaun ho ita-nia inísiu de aula iha semana oin entaun dala ida tan deside realiza misa iha ne’e, ne’e hanesan planu ba oin atu hahú aula tenki hala’o misa ida iha ne’e no depois ita halibur malu ho estudante sira kontente hamutuk antes ita hahú ita nia aula ba tinan ida-ne’e”, hateten Dekanu FAGRI.

 

Iha fatin hanesan Amu Selebrante Padre John Suban, SVD, hatete FAGRI fatin foun ne’ebé nakonu no haleu ho aihoris sira, tanba ne’e estudante sira bele fokus hodi rona dosente sira-nia lian ho di’ak.

 

“Ita mai iha ne’e (Kampus FAGRI Hera) rona mak manu fuik sira-nia lian, iha sidade rona barullu mak barak, tanba ne’e uza imi nia tilun hodi rona dosente nia lian ho di’ak komprende ninia konteúdu depois hakerek.

 

Ohin ha’u tama mai hakfodak tebes haree futuru di’ak mak iha ne’e, fasilidade sira di’ak ona importante mak estudante sira foku hodi aprende siénsia liuhusi teoria no prátika”, hatete Amu John.

Partisipa iha misa ne’e Pro-Reitor ba Asunto Informatização Transformação Digital e Inovação, Profesór Frederico Soares Cabral, Dekanu ho nia estrutura, Diretora Nacional Lojistika no Manutensaun, Sra. Fatima Odete da Cruz Monteiro, Dosente FAGRI, Funsionáriu no Estudante sira.

 

#TimorLeste #UNTL #FAGRI #SVD 14 Fevereiru 2025

Média : Agostinho da Cruz e Silva

Foto : Domingos Amaral & Laurindo da Cruz