Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH,Ph.D hamutuk ho estrutura vizita hodi haree direta kondisaun Polo Universitáriu UNTL nian, iha Suku Fuiloro, Postu Administrativu Lospalos, Munisípiu Lautém.
“Ita-nia objetivu iha ne’e atu haree direta kondisaun real, liuliu fasilidade sira hanesan, kulsaun, kolsa, froñas, sumasu no funsionamentu bee no sasan dapur sira ne’ebé bele fasilita kliente sira atu mai utiliza ita nia fatin ne’e. Maibé tinan ne’e ita labele hadia ita sei tau planu ba tinan 2026”, Reitór dehan iha Polo UNTL nian ne’ebé lokaliza iha Suku Natura, Lautém (8/2).
Iha fatin hanesan, Diretór Nasional Reseitas (DNR) nian, Sr. Mateus Amaral rekoñese katak, fasilidade no kondisaun seidauk bele responde ba misaun ne’ebé iha, espera tinan oin bele hadia.
“Agradese ba prezensa estrutura nian iha ne’e no ba dedikasaun funsionáriu sira-nian iha Polo Universitáriu ne’e, maské limitasaun barak, maibé nafatin pasiénsia hodi hala’o knaar, espera husi vizita ne’e, estrutura bele tau ba planu tinan oin”, dehan Diretór Amaral.
Vizita ne'e akompaña husi Proreitór ba Asuntu Planeamentu Monitorizasaun no Avaliasaun Profesór José Nelson Salsinha, Diretór Jeral ba Servisu Apoiu Reitoria Sr. Jacinto H. S. Belo, Diretór Nasional Planu no Finansas (DNPF) Sr. Egidio dos S. Filipe, Diretór Nasional Reseita, Sr. Mateus Amaral, Diretora Nasional Lojistika no Manutensaun Sra. Fatima Odete Cruz Monteiro, funsionáriu Polo Lospalos nian, Sr. Dinis da Costa, Sra. Veronica de Jesus, Sra. Ermita Marques inklui Asistente Tekniku sira.
Média 
: Leonia de Araújo da Costa
: Leonia de Araújo da CostaFoto
: Leonia de Araújo da Costa
: Leonia de Araújo da Costa