Universidade Nacional Timor Lorosa’e (UNTL) nia Reitór Interinu atuál Vise-Reitór ba Asuntu pos-Graduasaun no Peskiza Profesór Dr. Afonso de Almeida ho Diretór Ezekutivu Coral Triangle Initiative-Coral Reefs, Fishereries and Food Security (CTI-CFF) Dr. Frank Keith Griffin, asina Memorandu-Entendimentu (MoU) , iha Timor Plaza, Díli (04/11).
Profesór Afonso hatete, UNTL ho CTI-CFF asina memorandu ne’e hanesan oportunidade ida ba kooperasaun iha área Peska no Mariña nian hodi tulun liuhusi peskiza no formasaun oinsá atu próteje rekursu sira iha tasi-laran.
“Ohin ne’e kooperasaun entre UNTL ho CTI-CFF hodi koalia kona-ba oinsá mak ita konserva ho rekursu naturais tasi nian iha Timor-Leste, nune’e ba UNTL nu’udar oportunidade ida hodi dezenvolve sentru investigasaun sira hodi kontribui ba peskiza sira ligadu ho Ambiente iha Kosta Mariña nian”, hatete Prof. Afonso.
CTI-CFF ne’e harii husi nasaun sira hanesan Indonesia, Filipina, Malaysia, Timor-Leste, Papua Nugini no Illa Salomão ho objetivu atu tau matan no proteje ahu-ruin sira iha tasi-laran, tanba ahu-ruin sira ne’e hanesan uma no fatin ba espésie sira iha tasi atu hela ba.
Iha serimónia ne’e akompaña husi Dekanu Fakuldade Agrikultura Profesor Vicente Paulo Correia ho nia estrutura, reprezentante husi nasaun neen ne’ebé mensiona iha leten, Minisitériu Agrikultura Pekuária, Peska no Floresta (MAPPF) nia Diretór Jerál Peskás, Akikultura, no Jestaun Rekursu Akuátiku Sr. Celestino Cunha Barreto, ekipa tékniku no konvidadu sira.
Média UNTL 
: Agostinho da Cruz
: Agostinho da CruzFoto
: Dominggos Amaral
: Dominggos Amaral