
Universidade Nacional Timor Lorosa’e (UNTL) nia Fakuldade Ciencias Sociais (FCS) realiza Judisium ba dala-XXXI hodi atribui títulu akadémiku ba finalista sira hamutuk atus rua neennulu resin ualu (268), iha Salaun OKA, Díli (25/11).
Iha diskursu dekanu Faculdade de Ciências Sociais Profesór Alarico da Costa Ximenes, hato’o parabéns ba finalista sira ne’ebé simu ona titúlu akadémiku no agradese mós ba dosente sira ne’ebé guia ona estudante finalista hodi partilla koñesimentu no esperiénsia hodi prepara sai lideransa iha futuru.
“Ami hato’o susesu ba finalista sira hotu Fakuldade de Ciências Sosiais nian, ne’ebé ohin simu títulu akadémiku no espresa mós profundu gratidaun ba korpu dosente ne’ebé orienta no guia finalista sira hodi partilla koñesimentu, esperensia, valór sientífiku no prepara finalista sira atu sai lideres investigador no ajente transformador ba soseidade ida mais justa inklusiva no sustentável”, Dehan Dekanu.
Dekanu salienta, lori FCS nia naran hato'o deskulpa ba finalista sira ba eru hotu ne’ebé dosente sira halo durante prosesu aprendizajen, husu ba finalista sira kontinua aprende no estuda nafatin iha kualker fatin, tanba aprende la sai sasukat ba moris.
Iha fatin hanesan, Ministru Ensino Superior Ciência e Cultura (MESCC), S.E .José Honório da Costa Perreira Jerónimo hato’o parabéns ba inan-aman sira, tanba bele tau konfiansa ba UNTL liu-liu Faculdade de Ciências Sociais.
“Ha’u mós hakarak hato’o parabéns ba inan-aman sira, tanba ita boot sira bele tau konfiansa ba UNTL liu-liu Faculdade de Ciências Sociais hodi eduka ita boot sira-nia oan, ohin bele tama ona iha faze judisium nomós ha’u hakarak felisita finalista sira hotu ne’ebé iha tinan hirak nia laran hetan ona kursu iha universidade hodi halo sira-nia estudu”, Dehan Ministru.
Reprezentante estudante finalista Juvenciano Seixas S. dos Santos, agradese ba estrutura FCS no sivítas akadémika tomak ne’ebé ho esforsu tomak forma ona sira sai estudante krítiku no analítiku.
“Ami hakarak hato’o sentidu gratidaun ba sivitas akadémika tomak ne’ebé forma ami sai estudante krítiku, analitiku no inovativu, atende ami ho domin fasilta mós iha prosesu aprendizajen ho neon no laran tomak”, dehan nia.


Distribuisaun husi totál 268 ne’e husi Departamenu Administrasaun Públika (30), Siênsia Polítika (28), Dezenvolvimentu Komunitária (32), Polítika Públika (66), Komunikasaun Sosial (67), Relasaun Internasional (35) no Departamentu Inkluzaun Komunitária Sosial (10).
Média UNTL
: Domingos Amaral

Foto
: Agostinho da Cruz
