
Universidade Nacional Timor Lorosa’e (UNTL), nia Magnífiku Reitor Profesór dr. João Soares Martins MPH, Ph.D ho Ministru Ensinu Superior Siénsia no Kultura (MESSC) S.E. José Honório da Costa Pereira Jerónimo partisipa iha serimónia enseramentu resultadu Projeto Formar Orientar Certificar e Otimizar (FOCO) UNTL, iha Auditóriu FCS Caicoli, Díli (21/14).
Magnífiku Reitór hatete, projetu FOCO ho nia misaun mak habelar Lian Portugués, husu mós responsabilidade no dever hotu-hotu nian hodi kontribui, tanba língua portugués la’os língua estranjeiru, maibé lingua Timor-Leste nian mós.
“UNTL sai mós hanesan nain ba projetu ne'e, tempu hirak liu ba ita akompaña no testemuña ba apresentasaun rezultadu husi projetu FOCO ne'ebé susesu no atinje ho 95%, kontinua esforsu no servisu hodi bele hetan baze legal.
Espera estatutu UNTL nian hetan aprovasaun, nune’e luta atu iha dekretu lei ruma ne’ebé ekivalente ba sentru Lingua Portugés UNTL nian hodi bele iha kompeténsia ba sertifikasaun no kapasitasaun linguístika”, dehan Reitór.
Iha fatin hanesan MESSC, S.E. José Honório da Costa Pereira Jerónimo agradese ba parseria husi Portugal, nomós UNTL ba prosesu hotu, hatoo mós obrigadu ba dirijente, dosente funsionáriu sira ba servsiu ne’ebé fundamental hodi atinje susesu projetu FOCO nian ne’ebé fó formasaun kualifikasaun iha Lian Portugues ba estudante no dosente sira.
“Projeto FOCO hanesan sentru Lian Portugués iha UNTL ho objetivu atu promove formasaun no kualifikasaun iha Lian Portugués, projetu ne’e la’os funsiona de’it iha UNTL maibé mós ba públiku enjeral, husu atu kontinua luta no habelar nafatin lian portugués ba territoriu Timor laran”, dehan MESSC.
Koordenadór FOCO UNTL nian Profesór Samuel Venâncio de Sousa Freitas no atual Vise-Reitor para os Asuntos Académico e Garantia Qualidade agradese ba hotu hotu nia servisu hahú husi tinan 2019 too ohin loron bele finaliza projetu ne’e ho susesu.
“Espera Sentru Lian Portugués bele sai sentru sertifikasaun kompeténsia profesionalismu no exelente iha Timor-Leste nomós ba mundu, aliende Países Comunidade dos Países De Lingua Portuguesa (CPLP)”, hatete nia.

Partisipa husi Embaxadora Portugal iha Timor-Leste Sra. Manuela Freitas Bairos, Embaxador Angola iha Timor-Leste Sr. José Andrade de Lemos, Visereitór, Proreitór, Dosente no konvidadu sira.
Média UNTL
: Altur Ramos

Foto
: Altur Ramos no Denilson A. Barros
