Universidade Nacional Timor Lorosa’e (UNTL) nia representa Magnífiku Reitór atuál Proreitór ba Asuntu Planeamentu, Monitorizasaun no Avaliasaun Profesór Dr. José Nelson Salsinha hatete, inan-aman sira-nia investimentu ba oan sira nia futuru iha área edukasaun nian, labele sura kolen ba rikusoin sira ne’ebé gasta ba oan sira-nia prosesu estudu.
“Agradese ba inan-aman sira hotu, tanba ohin ita bo’ot sira mai asisti, edukasaun ne’e hanesan investimentu ida, labele sura kolen no rikusoin sira ne’ebé mak kuda hela ba ita-nia oan sira, tanba grasa Maromak nian ne’e bele mosu ohin ou bele aban, hanesan ohin estudante semana oin bele ministru ka tinan oin nia bele diretór ida, importante mak agradese nafatin ba Maromak”, hatete Proreitór Nelson iha Serimónia Judisium FAGRI nian, iha Auditóriu FECT-Hera, Díli (18/11).
Dekanu Faculdade de Agricultura Profesór Vicente Paulo Correia hatete, parte atu hatan ba preokupasaun setór agrikultura nian mak universidade nia knaar prepara rekursu úmanu ne’ebé preparadu atu kompete iha kampu de traballu.
“Atu hatan ba preokupasaun setór agrikultura nian mak parte universidade prodús rekursu umanu ne’ebé preparadu, tanba iha lubuk ida ne’e sira ultrapasa hanesan iha aula, prátika, liuhusi meiu oioin durante ita bo’ot sira aprende iha fakuldade”, hateten Dekanu FAGRI.
Iha fatin hanesan finalista Maria M. Ximenes do Rego husi Departamento de Agronomia enkoraja nia maluk atu sai atentu ho mudansa ne’ebé exelente no signifikativu iha sosiedade nia leet liuhusi siénsia ne’ebé aprende ona iha uma mahon UNTL liuliu FAGRI.“Wainhira fila ba moris iha komunidade nia le’et ita tenki sai ajente mudansa iha sosiedade, presiza lori mudansa ne’ebé signifikativu, klaru katak siénsia ne’ebé ita aprende husi uma mahon UNTL liuliu Faculdade de Agricultura bele sai ezemplár no ita presiza hatur ita-nia aan iha moris sosiedade nian, ne’ebé exelente no preferénsia iha hanoin nomós sai exelente iha ita-nia atitudi tomak”, hatete Maria.
Finalista hamutuk 170 mak hetan Judisium husi departamentu lima hanesan Departamento de Agronomia (44), Departamento de Agro-Pecuaria (41), Departamento de Saúde Animal (39), Departamento de Peskas no Siénsia Mariña (12).
Partisipa husi Dekanu Faculdade de Engenharia Ciência e Tecnologia Mestre Adalfredo Ximenes, Estrutura FAGRI, Dosente, Funsionariu, Estudante, konvidadu no Inan Aman sira.
Média UNTL 
: Agostinho da Cruz
: Agostinho da CruzFoto
: Domingos Amaral
: Domingos Amaral