Universidade Nacional Timor Lorosa’e (UNTL) liuhusi Proreitora ba Asuntu Provedoria no Akonsellamentu (PRAPA) realiza misa agradesimentu ba aniversáriu UNTL nian ba da-24 (17 Novembru 2000- 17 Novembru 2024), iha Kampus Sentrál UNTL nian, Díli (14/11) diriji husi Sua Eminensia Cardeal Dom Virgilio do Carmo da Silva, SDB.
Magnífiku Reitór Profesór dr. João Soares Martins, MPH,Ph.D agradese ba Sua Eminensia, tanba disponivel tempu hodi selebra misa agradesimentu iha loron importante UNTL nian, tanba husi prezensa Dom Virgilio nian, UNTL bele hetan bensaun no lori matenek ne’ebé iha hodi serbí nasaun no igreja.
“Hodi sivitas akadémika tomak nia naran hakarak agradese ba Sua Eminensia, tanba bele disponivel tempu mai selebra misa agradesimentu ba loron espesial universidade nian, no husi prezensa Dom Virgilio nian nu’udar momentu di’ak atu ema hotu iha UNTL bele hetan bensaun barak no haburas fiar iha Maromak no lori matenek ne’ebé iha hodi servi nasaun no igreja”, dehan dr. João.
Iha fatin hanesan, Sua Eminensia Cardeal Dom Virgilio do Carmo da Silva SDB, agradese ba familia boot UNTL nian, ne’ebé konvida hodi selebra Eukaristia hamutuk ho sivitas tomak, atu hato’o agradese ba Maromak liuhusi Eukaristia Santa, no dezeju katak servisu makas husi estudante, dosente, funsionariu, estrutura no parte hotu nian, bele hadi’ak liután kualidade UNTL, tanba ne’e husu atu ema hotu bele halo reflesaun ba momentu istóriku ida ne’e.
“Agradese ba konvida ha’u mai iha ne’e hodi selebra Eukaristia hamutuk ho família boot UNTL, ohin ita hamutuk atu agradese ba Maromak liuhusi Eukaristia Santa, ha’u dezeju katak ema hotu iha UNTL no parseiru sira bele servisu makaas hodi hadi’ak liutan kualidade universidade nian. Tanba ne’e presiza halo reflesaun didi’ak iha momentu istóriku ida-ne’e”, dehan Lider Másimu Igreja Katólika nian Dom Virgilio.
Selebrasaun Eukaristia Santa ne’e, akompaña husi Amu Ko-Selebrante Padre Kapelaun UNTL nian, Pe. Nivio Correia Lebre Fdcc no Pe. Acácio Domingos nu’udar mós prezidente Konsellu Jerál UNTL nian.
Selebrasaun Eukarista ne'e partisipa husi Eis Reitór, Visereitór, Proreitór, Diretór Jerál, Diretór Nacional, Xefe Departamentu, Dekanu, Dosente, Funsionáriu no estudante sira.
Média UNTL 
: Leonia de Araújo da Costa
: Leonia de Araújo da CostaFoto
: Leonia de Araújo da Costa & Denilson A. Barros
: Leonia de Araújo da Costa & Denilson A. Barros