Universidade Nacional Timor Lorosa’e (UNTL) liuhusi Proreitoria ba Asuntu Provedoria no Akonsellamentu (PRAPA) realiza atividade reflesaun ho tema “A Importância da Educação na Sociedade Timorense, em Relação com os Direitos e os Deveres, o Respeito e a Relação Humana” hodi komemora Dies Natalis UNTL nian ba dala ruanulu resin-haat (2000-2024), iha areadór Kampus Sentrál UNTL nian, DÍli (13/11).
Proreitora PRAPA nian Dra. Tereza de Jesus Vaz Cabral dehan, objetivu husi reflesaun ne’e atu komemora Dies Natalis UNTL nian, tanba nu'udar sarani molok atu halo atividade ruma tenke prepara an, buat hotu mudansa bainhira la'o hamutuk ho Maromak.
"Planu halo refleksaun ne'e atu komemora DIES NATALIS UNTL nian. Ita nu'udar sarani molok halo atividade, ita tenke prepara ita nia-an, buat hotu bele mudansa bainhira unidade, tanba ne'e ita halibur sivitas akademika no no konvida oradór sira mai halo refleksaun kona-ba fiar, oinsá ema mai husi relijiaun ida, inteira ita-nia an nu’udar komunidade akademika”, dehan Dra. Teresa.
Reprezentante Magnífiku Reitór , Profesór Lelis Gonzaga Fraga atual Proreitór ba Asuntu Dezenvolvimentu Institusional hatete, atividade reflesaun ne’e importante ba sosiedade akadémika hotu tanba bele lori ema hotu atu reflete UNTL nia ezisténsia.
"Atividade reflesaun ne’e importante ba ema hotu iha UNTL, tanba ita atu komemora Dies Natalis Universidade nian ba dala-24. No durante nia ezisténsia ne'e UNTL halo ona buat barak, produs ona rekursu Umanu ne'ebé mak kontribui ona ba dezenvolvimentu rai ida-ne'e, no dezenvolvimentu ba sosiedade ida ne'ebé mak buras liu tan”, dehan Profesór Lelis.
Oradora ba reflesaun ne’e, Madre Guilhermina Marçal hateten, importánsia edukasaun iha kontekstu Timor Leste nian, tanba ne’e edukasaun mak eduka no forma ema sai ema loloos. Tanba ne’e iha aniversáriu UNTL nian, presiza reviu fali sistema edukasaun hodi hatan ba urjensia nesesidade Timor-Leste nian.
“Ohin ita koa’lia kona-ba importansia edukasaun iha Timor-Leste, tanba edukasaun mak eduka no forma ema sai ema loloos, haree aniversáriu UNTL nian, husu atu Universidade bele reviu fali sistema edukasaun hodi hatan ba urjensia nesesidade Timor-Leste nian”, dehan Madre Guilhermina.
Reflesaun ne’e partisipa husi estrutura universidade nian, dosente, funsionáriu, estudante no konvidadu sira.
Média UNTL 
: Leonia de Araújo da Costa
: Leonia de Araújo da CostaFoto
: Leonia de Araújo da Costa
: Leonia de Araújo da Costa