Universidade Nacional Timor Lororsa’e (UNTL) nia Magnífiku Reitór Profesór dr. João Soares Martins, MPH, Ph.D husu ba sivitas akadémika atu halo reflesaun iha fulan Novembru hodi banati tuir valór luta eroi sira-nian, tanba sakrifika an ba independénsia, nune’e idaidak halo knaar ba dezenvolvimentu nasionál.
“Novembru mak fulan markante tebes iha ita-nia istória, semana tolu mai tan ita sei selebra aniversáriu ba dala 48 Proklamasaun Independénsia, nune’e mós sei selebra 12 novembru ita-nia joven sira brani tebes, maske kilat laiha liman, maibé sé sira-nia hirus matan hodi hasoru ita-nia inimigu sira iha altura ne’ebá.
Ita mós louva ita-nia maun bo’ot sira ne’ebé mak harii no kontinua funu ne’e to’o hetan independénsia, tanba ne’e ita presiza banati tuir”, hatete Reitór iha Kampus Sentral UNTL nian, Díli (04/11).
Prof. João mos husu ba sívitas Akadémika (estudante, dosente no funsionáriu) UNTL nian atu banati eroi sira ne’ebé luta ba libertasaun , liuhusi sivitas tomak iha dever hodi kumpri responsabilidade hanesan ba dezenvolvimentu UNTL no nasaun nian.
Iha serimónia isár bandeira fulan Novembru 2024 nian ne’e Korpu-Isar-Bandeira no Korru responsabíliza husi Faculdade de Ciências Exatas.
Partisipa husi estrutura Reitoria, Diretór Jeral, Diretor Nasionál, Xefe Departamentu, dosente, funsionáriu no estudante sira.
