Universidade Nacional Timor Lorosa’e (UNTL) liuhusi Faculdade de Agricultura nia Departamento de Pescas e Ciências Mariña (DPCM) servisu hamutuk ho World Fish Timor-Leste realiza konferénsia Internasionál ho tema “Haklean Peskiza no Estudu oioin iha área Peska no Siénsia Mariña ba Jerasaun Timor-Leste iha Futuru” iha Auditóriu FECT-Hera, Díli (23/10).
Iha abertura Reitór Interinu Profesór Dr. Samuel Venânçio de Sousa Freitas hatete, estudante presiza hatene no aprende kona-ba lala’ok parte mariña nian, tanba ne’e semináriu hanesan oportunidade atu aprende di’ak liután.
“Estudante hotu normalmente presiza aprende kona-ba parte peskiza nian, tanba bainhira sei estuda ne’e dezafiu atu komprende lala’ok peskiza nian, maibé aprende ho ema ne’ebé hatene liuhusi semináriu sira bele aumenta liután ita bo’ot sira-nia esperiénisa, tanba ne’e oportunidade tenki aproveita, ikus liu agradese ba parte hotu nia apoiu hodi realiza konferénsia ida-ne’e”, hatete Prof. Samuel.
Iha fatin hanesan Diretór World Fish Timor-Leste Dr. David Mills hatete nia parte kontenti tebes ho entusiasmu husi estudante ne’ebé marka prezensa no inisiativa atu hatene kona-ba peskiza nian hodi mellora liután koñesimentu hanesan akadémika ida.
“Kontenti tebes ohin ho ita bo’ot sira iha ne’e nomós haree ita bo’ot sira-nia entusiamu atu aprende siénsia kona-ba tasi nian nune’e eleva no exelente ita-nia akadémika, ida kapaas tebes ita bo’ot sira fó tempu duni hakarak atu hatene kona-ba peskiza iha tasi nian”, hatete Diretór World Fish .
Diretór Interinu DPCM nia Profesór Walter Oliveria Soares hatete, iha semináriu ne’e hakarak partilla esperiénsia liga ba peskiza iha tasi laran no tasi ninin sira ba estudante no dosente sira iha Faculdade de Agricultura liuliu Departamento de Pescas e Ciências Mariña nian.
“Objetivu husi semináriu ida ne’e atu aumenta koñesimentu ba dosente no estudante sira iha FAGRI no DPCM nian liga peskiza ne’ebé foka liubá mariña hanesan halo peskiza iha ‘area tasi laran, tasi ninin no seluk tan”, hatete.
Konferénsia international ne’e realiza, tanba servisu hamutuk entre UNTL liuhusi FAGRI nia DPCM ho World Fish Timor-Leste.
Partisipa husi Dekanu FAGRI Prof. Dr. Vicente de Paulo Coreia, Dekanu Faculdade de Engenharia Ciências e Tecnologia Profesór Adalfredo Xiemenes, dosente no estudante.Média UNTL 
: Agostinho da Cruz e Silva
: Agostinho da Cruz e SilvaFoto 
: Denilson Barros, Jaimito Caldas
: Denilson Barros, Jaimito Caldas