Universidade Nacional Timor Lorosa'e (UNTL) liuhusi Faculdade de Ciências Sociais nia Departamento de Comunicação Social (DCS) enserra atividade espozisaun ho tema "Papel Media Liuhusi Aprezentasaun Espozisaun Obra Estudante" iha Kampus FCS Kaikoli, Díli (05/10).
"Lori Departamento de Comunicação Social nia naran hakarak hato'o agradese wa'in ba oradór sira ne'ebé fó ona tempu hodi partilla informasaun ba estudante sira, espera ita boot sira ne’ebé partisipa iha atividade ne'e bele hetan buat balu mesmu la barak, maibé bele nakait netik buat balu iha imi-nia kakutak", dehan Diretór.
Diretór mos agradese ba partisipante sira nomós ba kompañia Silvia no Spirits of Timor ne’ebé fo ona apoiu ba iha atividade ida ne'e durante loron tolu nia laran.
Iha fatin hanesan Prezidente Komisaun Organizadora Agostinha Jose Gomes hateten, realiza atividade espozisaun ida ne'e atu kaderniza estudante sira-nia kapasidade nomós promove nafatin buat ne’ebé sira aprende.
"Espozisaun ida ne'e atu kaderniza ami nia kapasidade promove nafatin ami nia obra hirak ne’ebé aprende iha aula laran nomos iha terenu hodi partilla fila fali ba iha publiku hodi kontribui ba dezenvolvimentu, nune'e bele garante rekursu kualidade iha futuru mai iha area jornalizmu nain." Dehan prezidente Komisaun Organizadora.
Prezidente mos reforsa tan, agradese ba oradór sira ne’ebé fó ona sira-nia tempu hodi partilla esperiénsia liga ba iha área jornalizmu nian durante loron tolu.
Atividade espozisaun ne'e halao durante loron tolu hahú husi 3-5 Outubru, hetan apoiu husi Silvia Dili nomós Spirits of Timor, fó sai mós rezultadu ba manan-na'in sira iha kompetisaun Foto Jornalizmu, Jornal Parede nomós video.
Média UNTL 
: Domingos Amaral
: Domingos AmaralFoto 
: Angelino Soares (estudante DCS)
: Angelino Soares (estudante DCS)