Universidade Nacional Timor-Lorosa’e (UNTL) nia Faculdade Turismo Arte Industria Criativas e Culturais ensera atividade Estajiu Servisu Sosial (ESS) ne’ebé estudante na’in 105 hala’o durante fulan rua (2) iha Atauro, (01/10).
Iha entrevista Decano FTAICC Profesór Feliciano Quintas do Céu hateten, sente haksolok tanba estudante sira bele aplika sira-nia koñesimentu ne’ebé sira hetan durante iha sira-nia estudu ho programa fíziku ho non-fíziku.
“Hanesan Dekanu sente haksolok, tanba estudante sira mai aplika koñesimentu ne’ebé durante ne’e ita hanorin iha universidade no fakuldade realidade duni sira aplika liuhusi programa fíziku mak halo fatin lixeira nomós fatin fotospot no non-fíziku sira fó formasaun ba estudante sira iha Língua Inglés.
Iha fatin hanesan, Prezidente Autoridade Administrativa Atauro Sr. Mateus Belo hateten, hanesan autoridade sente kontenti ho estudante estajiáriu sira-nia prezensa lori mudansa ba iha suku tolu (3).
“Hanesan Prezidente Autoridade sente kontente ho prezensa estudante nian ne’ebé lori mudansa mai iha ami-nia fatin ida-ne’e liuhusi programa fíziku no non-fíziku.
Ami agradese ba universidade no fakuldade bele hili Atauro sai alvu ba atividade estudante sira-nia estájiu durante fulan rua”, dehan Autoridade.
Prezidente ne’e mós salienta, Atauro nia potensia boot tebes, nune’e ho estudante sira-nia prezensa ho atividade ne’ebé sira hala’o bele motiva komunidade Atauro sira halo promosaun di’ak liutan poténsia turístiku iha Atauro.
Prezidente Autoridade, autoridade lokal no komunidade sira ho matan-been entrega hikas estudante sira ba iha universidade liu-liu FTAICC, atividade Estájiu Servisu Sosial ne’e estudante hamutuk atus ida lima (105) ne’ebé halo ona sira nia estajiu durante fulan rua iha suku Maumeta, Beloi ho Bikeli.
Média UNTL 
: Domingos Amaral
: Domingos AmaralFoto 
: Mario Jonio Mendonça & Leonia de Araújo
: Mario Jonio Mendonça & Leonia de Araújo