Universidade Nacional Timor Lorosa’e (UNTL) liuhusi Gabinete Visereitora ba Asuntu Estudantís (GVRAE) nia Unidade Asunto Relasionado Questão Política de Género realiza Atividade Diskusaun Kafe Jéneru ho tema ‘’Conhecimento Com Abordagem de Forma Ético Sobre Questão Género’’ iha Salaun Ministériu Transporte no Komunikasaun nian, Kaikoli, Díli (27/09).
Visereitora ba Asuntu Estudantís (VRAE) Profesora Lígia Tomás Coreia hatete, atividade ne’e realiza ba edisaun dala-3 ona atu fó hanoin ba estudante sira hodi hatene oinsá luta ba libertasaun Timor-Leste nian no partisipasaun feto sira-nian iha vida polítika.
‘’Atividade ne’e realiza hodi konvida orador sira mai atu bele fahe sira nia esperiénsia ba estudante sira kona-ba oinsá esperiénsia luta nian ba libertasaun Timor hodi motiva estudante sira atu bele buka hatene kona-ba istória abordajen Timor-Leste nian’’, dehan VRAE.
Profesora Ligia hatutan, atividade ida-ne’e realiza ba dala-3 ona no iha ámbitu komemorasaun loron Konsulta Populár ne’e ho tema ne’ebé iha leten atu bele koalia mós kona-ba asuntu jéneru nian, no liuliu atu fó hanoin nafatin ba estudante sira oinsa Timor-Leste nia Forma Ético ba Questão Género iha tempu pasadu.
Iha fatin hanesan, Profesór Eurico Celestino dos Reis Araujo nu’udar oradór hatete, fahe esperiénsia ba estudante sira kona-ba oinsa esperiénsia luta iha tinan hirak liubá no oinsa partisipasaun feto nian iha luta libertasaun nasional Timor-Leste.
‘’Ohin ha’u mai atu fahe ha’u-nia esperiénsia ba estudante sira kona-ba prosesu luta ba libertasaun nasional no oinsa haree ba feto sira-nia partisipasaun iha polítika hodi luta ba ukun rasik aan no ha’u hakarak dezafia estudante sira ohin loron atu bele esforsu makaas hodi bele estuda atu hadia rai ida ne’e di’ak ba oin’’, dehan Profesór Eurico.
#TimorLeste #UNTL #VRAE #GARPQG 30 Setembru 2024
Média UNTL 📝: Laurindo da Cruz Gomes
Foto 📷: Roberta da Cruz (estajiária)