Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH,Ph.D asina memorandu ho Magnífiku Reitór Universidade Baoshan (UB) China nian, Sr. Chu Yanhuai hodi koopera iha área Agrikultura liuliu produsaun Kafé iha Timor-Leste no China nian, iha Sala-Videokonferénsia UNTL, Díli (26/09).
Iha serimónia ne'e, Reitór hatete, asina ona memorandu ho Universidade Baoshan China no sei foku ba área agrikultura nian, liuliu produsaun Kafé no sira mós fó oportunidade ba estudante Faculdade de Agrikultura nian bele ba halo estudu komparativu iha UB China.
"Ohin ita asina ona akordu ho Universidade Baoshan China, no ami halo diskusaun kona-ba kooperasaun nian, maibé sira hakarak ita koopera iha Agrikultura liuliu produsaun kafe, no sira mós hakarak fó oportunidade ba ita-nia estudante Faculdade de Agrikultura sira atu bele ba halo estudu komparativu iha sira-nia universidade", dehan Reitór.
Reitór Universidade Baoshan nian, Sr. Chu Yanhuai orgullu tanba bele mai iha Timor-Leste, hodi vizita UNTL no konsege asina akordu, no iha kooperasaun ne'e UB hakarak haree liuba Fakuldade de Agricultura liuliu produsaun kafé, tanba Timor-Leste mos iha poténsia ba kafé nian, no iha mós oportunidade ba estudante sira bele ba halo estudu komparativu iha UB.
"Ha'u sente ondradu tebes mai iha Timor no vizita mós UNTL ba dahuluk hodi konsege asina ona akordu, ami mai iha ne'e ami hatene katak UNTL mak universidade públiku iha Timor-Leste no ha'u rona katak UNTL prodús ona rekursu kualifikadu barak no balu sai Prezidente Repúblika.
Ami hakarak koopera no ami sei foka liuba produsaun kafé, tanba Timor-Leste mós iha potensia ba kafé, maibé ami sei fó oportunidade ba estudante sira bele halo estudu komparativu iha ami-nia Universidade", tenik Reitór Chu.
Hafoin serimónia asina akordu, ekipa husi UB nian akompaña husi estrutura UNTL halo vizita mós ba Biblioteka Sentral hodi haree direta kondisaun no livru sira iha biblioteka laran.
Partisipa iha Asina Memorandu nee, Visereitór ba Asuntu Akadémiku no Garantia Kualidade Profesór Samuel Venâncio de Sousa Freitas, Proreitór ba Asuntu Kooperasaun nian, Profesór Tomé Xavier Jerónimo, Dekanu FEAH nian, Profesór Teodoro Soares, Diretór Baoshan University nian, Sr. Yang Chunhua ho ekipa.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa, Agostinho da Cruz e Silva & Roberta Pereira
: Leonia de Araújo da Costa, Agostinho da Cruz e Silva & Roberta Pereira