Universidade Nacional Timor Lorosa’e (UNTL) nia Diretór Sentru Estudu ba Paz (SEP) Profesór Antero Benedito da Silva hatete, dezde inísiu 2024 ne’e, SEP implementa ona atividade peskiza nian kona-ba “Seguransa Humana Iha Fronteira” ho objetivu atu mellora kapasidade estudante sira-nian iha atividade peskiza.
“Durante ne’e ami halo ona peskiza kona-ba “Seguransa Humana Iha Fronteira” no agora hein de’it atu lansa no haree mós programa Mestradu ba estudante sira liuhusi programa Pós-Graduasaun UNTL nian.
Objetivu peskiza ida-ne’e atu bele buka hatene oinsa komunidade sira ne’ebé hela besik iha fronteira nia asesu ba Edukasaun no Saúde liuliu ba labarik sira”, Dehan Profesór Antero iha Kampus Sentral UNTL nian, Díli (28/08).
Profesór Antero hatutan, aliende peskiza SEP mós oferese espasu ba estudante sira hodi voluntáriu no oferese mós biblioteka ba estudante sira hodi estuda, halo peskiza, diskusaun no komunika ho liña ministeriál sira atu bele treina estudante sira sai lider ne’ebé di’ak iha futuru.
“Benefísiu husi atividade sira-ne’e mak bele tulun estudante sira gradua ho kualidade di’ak iha sira ida-idak nia departamentu, tanba iha ne’e hanorin sira peskiza, hakerek sientífiku hodi aumenta sira nia koñesimentu iha área sira no fatin ne’e mós la’ós ba de’it estudante UNTL, maibé loke mós ba estudante sira hotu husi Universidade Públiku no privadu sira bele mai asesu”, hatutan Diretór Benedito.
Média UNTL 
: Laurindo da Cruz Gomes
: Laurindo da Cruz GomesFoto 
: Laurindo da Cruz Gomes
: Laurindo da Cruz Gomes