Universidade Nacional Timor Lorosa’e (UNTL) liuhusi Human Rights Center (HRC) realiza konferénsia ho tema "Reflection on the 25th Aniversary of the Referendum, Former Head of the United Nations Mission in East Timor (UNAMET)" konferénsia reflesaun no partilla istória Timor-Leste nian hodi komemora tinan 25, 30 Agustu (1999-2024) Referendun Timor-Leste nian, iha Auditóriu FCS Kaikoli, Díli (27/08).
Iha diskursu Reitór Interinu Profesór Dr. Afonso de Almeida, agradese ba HRC bele realiza ona konferénsia hodi komemora loron konsulta popular, hodi halo reflesaun ba pasadu no partilla ba joven sira hodi komprende istória Timor-Leste nian.
"Agradese ba HRC bele realiza eventu ida ne'e hodi komemora loron konsulta popular, husi konferensia ida ne'e laos deit atu halo reflesaun ba pasadu maibé bele kapasita mós koñesimentu joven sira iha nível ensinu supeior nian hodi bele entende kona-ba prosesu luta ba libertasaun, nune’e mós bele konvida Eis-Xefe UNAMET nian Sr. Ian Martin hodi partilla kona-ba prosesu organiza referendum iha 30 Agustu 1999 liubá", dehan Reitór Interinu.
Oradór ba konferénsia Sr. Ian Martin nu’udar Eis-Xefe UNAMET nian hatete, husi konferensia ida ne'e nu’udar oportunidade di’ak hodi partilla hamutuk esperiénsia ba dosente no joven sira kona-ba prosesu naruk lider timoroan sira esforsu ho polítika oioin ikus mai konsege manan independénsia liuhusi votu povu nian.
"Ha'u orgullu bele mai partilla esperiénsia kona-ba loron konsulta popular nian ba dosente no estudante sira, tanba iha pasadu lider timoroan barak ho esforsu makaas luta ho polítika oioin, no ikus mai Timor-Leste hetan determinasaun liuhusi votu povu nian. Ha’u espera husi istória naruk ne'ebé ita boot sira rona bele sai nu’udar referénsia di’ak iha futuru", dehan Ian Martin.
Konferensia ne'e modera husi Diretór Sentru Direitus Umanus Profesór Dr. Armindo Maia no partisipa husi Dekanu FCS Profesór Dr. Alarico da Costa Ximenes, Pró-Reitor para os Assuntos de Desenvolvimento Instituicional Profesór Dr. Lelis Gonsaga Fraga, Dosente, Estrutura FCS , estudante no konvidadu sira.
Média UNTL 
: Mario J. Mendonça
: Mario J. MendonçaFoto 
: Domingos Amaral
: Domingos Amaral