Universidade Nacional Timor Lorosa’e (UNTL) nia Magnífiku Reitór Interinu no atuál Visereitór ba Asuntu Pós-Gaduasaun no Peskiza Profesór Afonso de Almeida ho Embaxadór Japaun iha Timor Leste, Tetsuya Kimura, atribui bolsu-estudu ba estudante na’in-ruanulu (20), iha Auditóriu FCS, Kaikoli, Díli (22/08).
“Ami hato'o agradese ba Embaxada Japaun no Ofisial JICA nian ba parseria ne'ebé apoiu kontinua hodi promove oportunidade edukasaun ba ami-nia estudante sira. UNTL apresia apoiu ho kolaborasaun husi Japaun hodi ajuda TL atinje objetivu dezenvolvimentu iha nasaun”, dehan Profesór Afonso.
Embaxadór Japaun iha Timor-Leste Tetsuya Kimura hatete, Astomos Energy oferese ona bolsu estudu ba estudante na’in 20 kada tinan komesa husi 2015 ate agora kobre ona totál 200.
“Ha’u espera katak estudante UNTL bele aproveita ho di’ak apoiu hirak ne’e hodi dezenvolve sira-nia kapasidade ne’ebé sei lidera ba opurtunidade barak liutan. Ha’u mós deseju di’ak ba sira nia estudu no espera katak sira sei kontribui ba harii futuru ida ne’ebé diak liu ba Timor Leste”, dehan Embaxadór Tetsuya.
Presidente Astomos Energy Corporation Sr. Mitsuru Yamanaka hato'o agradese ba nasaun Timor-Leste, tanba bele kontinua nafatin relasaun ne’e.
“Ami espera katak liuhusi bolsu-estudu ne'e sei hala'o papél signifikativu la'ós de'it iha dezenvolvimentu rekursu umanu, maibé mós iha relasaun amizade entre Timor-Leste no Japaun. Parabéns ba imi hotu ne'ebé simu bolsu estudu, espera susesu iha vida akadémika no iha futuru ne'ebé prosperu”, dehan Yamanaka.
Bolseiru na’in 20 ne’e kompostu husi Faculdadede Agricultura (3), Faculdade de Ekonomia e Gestão (2), Faculdade de Educação Artes no Humanidades (5), Faculdade de Ciências Exatas (2), Faculdade de Direito (1), Faculdade de Medicina no Ciência da Saúde (3), Faculdade de Filosofia Ciência Humana (1), Faculdade de Ciências Sociais (2), Faculdade de Turismo Artes Indústria Creativas Culturais (1).
Partisipa husi Proreitór Asuntu Kooperasaun Profesór Tome Jerónimo Xavier, Proreitora ba Asuntu Provedoria e Akonsellamentu Profesora Tereza de Jesus Vaz Cabral Diretor Jeral Servisu Apoiu Reitoria Sr. Jacinto H. S. Belo, Diretora Jeral Ensino Superior Siensia Kultura Sra. Maria Filomena Lay Guterres, dekanu sira, funsionáriu, estudante no reprezentante família sira.
Média UNTL 
: Laurindo da Cruz Gomes
: Laurindo da Cruz GomesFoto 
: Domingos Amaral /Laurindo da Cruz
: Domingos Amaral /Laurindo da Cruz