Universidade Nacional Timor Lorosa’e (UNTL) liuhusi Faculdade de Educação Artes e Humanidades (FEAH) nia Departamento de Ensino de Fizika (DEF) realiza semináriu ho tema “Habelar Siénsia no Teknolojia Liuhusi Segredu Planetáriu no Natureza” hodi komemora ezisténsia DEF nian ba-dala 23 (2001-2024).
Iha Kampus Liceu, Díli (16/08) Dekanu FEAH Profesór Teodoro Soares hatete, atividade ne’ebé hala’o hodi komemora ezisténsia DEF nian ba-dala XIII, liuhusi Semináriu, Espozisaun, Limpeza jerál hodi hametin amizade iha departamentu.
“Objetivu prinsipál husi atividade ne’e mak, ita bele hametin amizade ba malu entre estudante ho dosente, hodi relembra fali akontesimentu sira ne’ebé akontese durante tinan 23 nia laran andamentu DEF no bele esplora planu sira ne’ebé iha hodi hadia problema sira ne’ebé estudante sira hasoru”, dehan Dekanu.
Iha fatin hanesan Diretór DEF Profesór Marianus de Fátima Ude hatete, aniversáriu DEF nian iha 15 Agostu, tanba ne’e iha atividade espozisaun, semináriu no limpeza.
“Atividade sira ne’ebé ita realiza mak hanesan Semináriu, Limpeza Jerál, Misa Agradesementu no Espozisaun atu bele mellora estudante sira-nia koñesementu liuhusi atividade sira ne’ebé realiza. Nune’e bele tulun estudante sira atu iha amizade ho dosente, alumni no estudante ativu”, dehan.
Xefe Komisaun organizadora Antonio da Costa Pinto Gomes hatete, atividade importante hodi hametin amizade no promove talentu estudante sira-nian.
“Atividade sira ne’e realiza hodi selebra aniversáriu DEF nian ba-dala XXIII no liuhusi atividade sira ne’e atu bele promove estudante sira-nia talentu no atu bele hadia mós problema sira iha departamentu nian durante tinan 23”, dehan Komisaun Organizadora.
Média UNTL 
: Laurindo da Cruz Gomes
: Laurindo da Cruz GomesFoto 
: Altur Ramos
: Altur Ramos