Universidade Nacional Timor Lorosa’e (UNTL) liuhusi Faculdade de Educação Artes no Humanidades (FEAH) nia Departamento de Ensino de Qumica (DEQ) realiza Espozisaun no Semináriu ho tema “Hamutuk Kria Paz no Unidade Hodi Dezenvolve Edukasaun Ne’ebé Kualidade” iha ámbitu komemorasaun aniversariu DEQ nian ba-dala XXIII.
Asistente Laboratoriu DEQ Profesór Salvador Gusmão hatete, atu komemora loron departamentu nian ba-dala XXIII liuhusi espozisaun no semináriu hodi fahe esperiénsia, relasaun ho pratika simples, aleinde ne’e fó biban ba finalista sira hodi aprezenta sira-nia peskiza.
‘’Objetivu husi atividade ne’e atu habelar nafatin siensia ba estudante sira hodi nune’e bele kontribui ba nasaun ida-ne’e, liuhusi matenek ne’ebé sira hetan. Ami mós fó biban ba ami-nia estudante finalista sira ne’ebé remata ona peskiza atu aprezenta sira-nia peskiza monografia ba estudante ativu sira liuhusi espozisaun ne’ebé hala’o’’, dehan Profesór Salvador, iha Kampus Liceu, Díli (9/08).
Iha fatin hanesan, Komisaun Organizadór Jovito Miguel Sani Colo hatete, atividade ne’ebé hala’o ne’e hanesan meiu ida atu selebra departamentu nia aniversáriu ba-dala XXIII ne’ebé monu iha 3 Agostu liuba.
“Aniversariu departamentu nian monu iha 3 Agostu, maibé kestaun tanba fatin atu realiza atividade sira mak agora ami foin realiza. Atividade ne’e ho objetivu atu dezenvolve kreatividade estudante sira-nian liuhusi espozisaun hodi hasa’e kapasidade no hametin lasu amizade entre estudante ativu, finalista, alumni no dosente”, dehan estudante Colo.
Atividade ne’e realiza servisu hamutuk entre Departamentu no Asosiasaun Akadémika Estudantíl no partisipa husi Dekanu FEAH Profesór Teodoro Soares, Dosente, Funsionáriu no Estudante sira.
Média UNTL 
: Laurindo da Cruz Gomes
: Laurindo da Cruz GomesFoto 
: Mario Jonio Mendonça/Arkivu Departamento Quimica
: Mario Jonio Mendonça/Arkivu Departamento Quimica