𝐔𝐍𝐓𝐋 𝐇𝐎 𝐀𝐒𝐄𝐀𝐍 𝐔𝐍𝐈𝐕𝐄𝐑𝐒𝐈𝐓𝐘 𝐍𝐄𝐓𝐖𝐎𝐑𝐊 𝐃𝐈𝐒𝐊𝐔𝐓𝐄 𝐏𝐎𝐒𝐈𝐁𝐈𝐋𝐈𝐃𝐀𝐃𝐄 𝐊𝐎𝐎𝐏𝐄𝐑𝐀𝐒𝐀𝐔𝐍

Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D hasoru malu ho Diretór Ezekutivu Asean University Network (AUN) hodi diskute prosesu no posibilidade UNTL nian atu sai membru AUN nian, nune’e bele koopera ho universidade sira, banhira Timor-Leste sai ona membru iha ASEAN.

 

Reitór hatete, UNTL seidauk sai membru AUN, tanba ne’e futuru Timor-Leste sai membru ASEAN, UNTL mós hola parte nu'udar membru hodi koopera ho universidade sira ne'ebé sai ona membru ba AUN.

 

"Ohin ita hasoru malu ho Asean University ne'e, sira esplika kona-ba estabelesimentu AUN nian katak, lider sira iha Asean mak harii desde 1995, tanba Timor-Leste seidauk sai membru iha Asean.

 

Ita UNTL seidauk sai mós membru AUN hamutuk ho universidade 30, atu sai membru ne'e limitadu, entaun karik futuru mak ita sai membru ba AUN ne'e previlejiu boot", Reitór dehan iha Sala-Videokonferénsia UNTL nian, Díli (9/8).

 

Diretór Ezekutivu Sr. Choltis Dhirathiti hatete, hasoru malu ne'e, hodi deskuti kona-ba oinsa bele esplora kolaborasaun, relasaun ho servisu akadémiku nian, aspetu sira ne'ebé bele tulun universidade liuhusi atividade sira ne'ebé organiza husi AUN nian.

 

"Obrigada ba oportunidade ne'ebé fó mai ami hodi vizita UNTL, ohin ami deskuti ona oinsá UNTL bele sai membru iha AUN, bainhira Timor Leste sai ona membru iha ASEAN.

Objetivu mak ita bele esplora atividade akademiku ba malu, maibé sira UNTL bele partisipa, maibé sai ona membru mak foin bele koopera di'ak ho universidade sira iha AUN", tenik Diretór Choltis.

 

Partisipa husi Visereitór ba Asuntu Pós Graduasaun no Peskiza, Profesór Afonso de Almeida, Proreitór, Dekanu, Dosente, Asistente Tékniku no ekipa husi AUN nian.

 

Média UNTL : Leonia de Araújo da Costa

Foto : Leonia de Araújo da Costa & Domingos Amaral