Universidade Nacional Timor Lorosa’e (UNTL) liuhusi Faculdade de Engenharia Ciênsia e Tecnologia (FECT) nia estudante hamutuk atus rua ruanulu resin ualu (228) mak dezloka ona ba hala’o Estájiu Servisu Sosiál (ESS) iha munisípiu tolu Baucau, Atauro no Liquiça durante fulan rua Jullu to’o Setembru.
Visedekanu ba Asuntu Akadémiku nian, Profesór Tomas Soares Xavier, iha kampus FECT nian, Díli (29/7) hatete, dadaun ne’e FECT nia estudante husi departamentu haat mak hala’o Estájiu Servisu Sosial iha Munisípiu, Baucau, Ataúro no Liquiça.
“Departamentu haat hanesan, Departamentu Enjeñaria Jeolojia no Petroleu (64) estajiu iha Munisipiu Baucau, Departamentu Mekanika hamutuk (49) iha Baucau no Ataúru hahú husi 23 Jullu no remata iha 09 Setembru, Departamentu Enjeñaria Informátika hamutuk 57 estajiu iha Munisipiu Liquiça hahú husi 15 Jullu to’o 15 Agostu, Departamentu Eletrónika no Eletrika (58) iha Liquiça hahú husi 8 Jullu no to’o 19 Agostu 2024”, dehan Visedekanu.
Visedekanu mós esplika, normalmente Estájiu Servisu Sosial ne’e nia durasaun fulan rua no remata estájiu, estudante sira sei aprezenta relatóriu ba departamentu idaidak.
Aleinde ESS, Vise-dekanu mós haktuir, estudante na’in-87 Departamentu Enjeñaria Sivil mak hala’o Estájiu Profesional iha instituisaun governu no privadu sira iha Díli, Ermera no Maliana, hahú husi 25 Jullu to’o 25 Setembru 2024.
“Fakuldade mós dezloka estudante na’in 87 ba hala’o estájiu profisionál iha instituisaun governu no privadu sira iha Díli, Ermera no Maliana no atividade ne’ebé estudante sira halo bazeia ba komunidade nian nesesidade no buat ne’ebé bele fó benefísiu ba sira no komunidade rasik”, dehan.
Média UNTL 
: Domingos Amaral
: Domingos AmaralFoto 
: Agostinho da Cruz
: Agostinho da Cruz