Universidade Nacional Timor Lorosa'e (UNTL ) nia Magnífiku Reitór, Profesór dr. João Soares Martins, MPH, Ph.D hamutuk ho Primeiru-Ministru S.E Kay Rala Xanana Gusmão, halo abertura ba Kursu Mestradu iha área Politicas Publicas (PP), iha Auditóriu FCS, Caicoli, Díli (23/7).
Primeiru-Ministru, Kay Rala Xanana Gusmão hatete, kursu Politicas Publicas ne'e importante tebes, tanba ne'e presiza análiza no diskusaun barak, maibé estudante sira presiza análiza, la'os katak hotu hotu hatene, maibé buka atu aprende, siénsia ne'ebé eziste iha Politicas Publicas.
"Ohin ita lansa kursu Politicas Publicas, tanba kursu ne'e importante tebes, presiza diskusaun no análiza barak, husi siénsia hotu ne'ebé ita aprende, oinsa mak bele loke hanoin no motiva estudante sira, la’ós koñese área ida de'it, tenke esforsu hodi koñese tan área seluk, husi koñesimentu hirak ne'e, ema la isoladu ona, maibé moris idenpendente hodi kontinua ba jerasaun foun sira no bele rezulta benefisiu boot ba povu no nasaun", dehan PM Xanana.
Magnífiku Reitór hatete, Kursu Politicas Publicas importante tebes, tanba ne'e bele kontribui di'ak liu ba dezenvolvimentu nasaun nian, partikularmente iha área eduaksaun no área hotu, iha governasaun Timor –Leste nian.
"Ohin ita hamutuk iha ne'e ho objetivu atu lansa kursu Mestradu iha área Politicas Publicas nian, tanba kursu ida-ne'e importante tebes hodi kontribui ba dezenvolvimentu Timor-Leste nian, dadaun ne'e ita-nia Nasaun seidauk iha mestradu iha área Politicas Publicas, tanba ne'e importante tebes hodi aumenta Timoroan sira-nia koñesimentu iha nivel mestradu nian", tenik Reitór.
Kursu mestradu iha area Politicas Publicas ne'e simu ona estudante hamutuk ruanulu-resin lima (25) no aula hahú iha loron 23 fulan Jullu tinan 2024.
Partisipa iha abertura ne'e, Ministru Ensinu Superior Siénsia no Kultura (MESSK) nian, Profesór José Honório da Costa Jerónimo, Prezidente Konsellu Jerál UNTL, Padre Acacio Pinto, Eis Reitór, Visereitór, Proreitór, Diretór Jerál, Diretór Nacional, Dekanu, Visedekanu, Diretór Departamentu, dosente funaionáriu, estudante no konvidadu sira.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa & Mario Jonio Mendonça
: Leonia de Araújo da Costa & Mario Jonio Mendonça