Universidade Nacional Timor Lorosa'e (UNTL) nia Diretór ba Centro de Estudo Cultura e Arte (CECA) Profesór Vicente Paulino, entrega ona prémiu ne'ebé funsionáriu na'in-ruanulu resin rua (22) sai manan na'in dahuluk iha Kompetisaun Korál Funsaun Públika 2024 nian, ba Magnífiku Reitór Profesór dr. João Soares Martins, MPH, Ph.D.
Iha Sala Videokonferensia UNTL nian, Díli (22/7), Magnífiku Reitór hato'o parabéns ba funsionáriu na'in rua nulu resin rua ne'ebé reprezenta UNTL hodi partisipa iha kompetisaun refere no konsege sai manan na'in dahuluk, agradese ba esforsu hotu ne'ebé ekipa halo durante prosesu tomak.
"Kontente tebes haree rezultadu ne'e, no parabéns ba imi na'in-22 ne'ebé reprezenta UNTL hodi partisipa iha kompetisaun ne'e no ita konsege hetan 1 lugar, agradese mós ba ekipa hotu nia esforsu durante prosesu tomak", dehan Reitór.
Iha fatin hanesan, Diretór CECA Profesór Dr. Vicente Paulino agradese ba ekipa ne'ebé sólidu tebes hodi lori UNTL sai ona manan na'in dahuluk ba kompetisaun refere.
"Parabéns ba imi hotu, no iha inísiu ha'u dehan ba sira katak tenke esforsu hodi sai 1 lugar no ikus mai gaña duni, prémiu ne'e ita hamutuk entrega ba Magnífiku Reitór no espera katak tinan oin ita partisipa no ita tenke mantein ho valór ne'e", tenik Diretór CECA.
Alende ne'e, Reitór entrega mos sertifikadu apresiasaun ba membru korál sira.
Seremónia refere partisipa husi Xefe Departamentu Arte no Kontemporanea (DAK)- CECA nian, Sra. Emeliana Da Costa Borromeu Andrade no ekipa Korál sira hotu.
Média UNTL 
: Leonia de Araújo da Costa
: Leonia de Araújo da CostaFoto 
: Agostinho da Cruz e Silva
: Agostinho da Cruz e Silva