Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins asina memorandu ho Ministériu Comercio Industria (MCI) S.E Ministru Filipos Nino Pereira, iha salaun MCI Mandarin, Díli (19/07), hodi kopera iha área produsaun mákina halo tua-sabu no tizolu.
“Agradese ba S.E Ministru nomos ministériu, tanba bele finansia projetu ida ne’e, espera liuhusi aprezentasaun ne’e bele fó rezultadu ne’ebé di’ak hodi ajuda komunidade moderniza sira-nia produsaun tua no tunu tizolu liuhusi mákina ne’ebé FECT produz.
Liuhusi kooperasaun ne’e bele atinji objetivu hadia ita-nia komunidade nia moris di'ak la barak, maibé bele redús persentajen ema ne’ebé moris iha liña probreza nia okos”, dehan Reitór.
Reitor akresenta, universidade apresia tebes, tanba sempre motiva profesór sira nafatin peskiza liu-liu servisu estensaun komunitária, atu nune’e bele fó benefisia ba komunidade no hanorin estudante jerasaun foun sira atu bele la’o tuir.
“Husu ba investigadór prinsipál (Profesór Domingos de Sousa Freitas) sira atu implementa prinsípiu servisu sira-ne’e, ita bele transfere koñesimentu ba ita-nia estudante sira atu mantein sustentabilidade ba atividade sira hanesan ne’e. Tanba ne’e ho akordu ne’e bele halo servisu relasaun di’ak efetivu no mais produtivu liutan”, dehan.
Iha fatin hanesan S.E Ministru Komersiu Indústria, Filipos Nino Pereira apresia ho aprezentasaun ne’ebé Profesór Domingos de Sousa Freitas halo bazeia ba peskiza ne’ebé tuir situasaun real Timor-Leste nian.
“Ami agradese ba kooperasaun ne’ebé la’o ona, ha’u hanoin bazeia ba faktu informasaun sira ne’ebé real bele lori ita ba hatene iha kondisaun ka nesesidade grupu mikro-pekena indústria sira ne’ebé presiza loos, nune’e ami haree katak ne’e importante tebes iha ita-nia apoiu ba mákina ka ekipamentu ne’ebé tuir duni saida mak sira presiza”, dehan Ministru.
Ministru dehan, ho koñesimentu ne’ebé mai husi UNTL envolve estudante sira bele prodús mákina prátika di’ak hodi tulun grupu sira no bele fortifika kooperasaun MCI nune’e bele kontinua apoiu malu iha parte seluk.
Partisipa husi Visereitora ba Asuntu Estudantís, Doutora Lígia Tomás Correia, Proreitór ba Asuntu Kooperasaun Profesór Tóme Xavier Jerónimo, Dekanu FECT Profesór Adalfredo da Silva Ximenes ho estrutura nomós ekipa husi MCI.
