Universidade Nacional Timor Lorosa’e (UNTL) nia Direçao Geral dos Serviços de Apoio a Reitoria servisu hamutuk ho Universidade de Aveiro no Universidade Nova de Lisboa realiza Worshop ho tema ''Risco, Alterações Climáticas e Soluções Baseadas na Natureza'' iha Auditóriu Faculdade de Ciências Sociais (FCS) nian, Kaikoli Díli (18/07).
Reprezentante Magnífiku Reitór no atuál Visereitór ba Asuntu Pós-Graduasaun no Peskiza Profesór Afonso de Almeida hatete, worshop ne’e importante tebes hodi koalia kona-ba alterasaun klimátika ho risku sira ba komunidade no atividade ema nian mak fó impaktu ba natureza.
‘’Dalabarak atividade ema nian ne’ebé hala’o mak fó impaktu ba ambiente no natureza, tanba liuhusi atividade sira-ne’e bele lori impaktu pozitivu no negativu, ho ida-ne’e mak ohin ita deskute iha ne’e hodi tau hamutuk hanoin ba solusiona problema sira ne’ebé ligasaun ho sustentabilidade no ekosistema nian iha futuru nomós ita bele iha konsiénsia ba atividade sira ne’ebé ita hala’o’’, dehan Visereitór.
Iha fatin hanesan Oradora Profesora Myriam Lopes husi Universidade de Aveiro hatete, alterasaun klimátika no dezafiu sira ne’ebé koloka umanidade nia atividade, tanba problema alterasaun klimátika sai mós problema ema nian.
‘’Ita tenki halo adaptasaun ba mudansa klimátika sira ne’ebé iha planeta ne’e no problema ne’e mak ita tenki halo sensibilizasaun ba ema hodi hasa’e koñesimentu no halo diskusaun hodi servisu hamutuk ho komunidade sientífika, politiku sira, organizasaun naun governamentais ho komunidade sira hodi bele adapta kondisaun iha Timor-Leste, atu nune’e iha futuru ema bele moris iha sustentabilidade, rejiliente”, dehan oradora Lopes.
Partisipa iha worshop ne’e Diretor Geral dos Serviços de Apoio a Reitoria Sr. Jacinto H. S. Belo, Proreitora ba Asuntu Provedoria no Akonsellamentu Profesora Teresa de Jesus Vaz Cabral, Oradór Profesór José Carlos Ferreira, Dekanu, Diretór Departamentu, Funsionáriu, Dosente, Senadu estudantíl no estudante sira.
Média UNTL 
: Laurindo da Cruz Gomes
: Laurindo da Cruz GomesFoto 
: Eugenia de Jesus & Domingos Amaral
: Eugenia de Jesus & Domingos Amaral