Universidade Nacional Timor Lorosa’e (UNTL) nia Centro do Estudo Arte e Cultura (CECA) apoiu husi grupu Sangar Santo António Kampung Alór, promove Atividade Kulturál liuhusi kompetisaun kulturál iha Católica Santa Maria (SAMARIA) Ainaro, ho tema “CECA Visita Eskola Haburas UNIDADE liuhusi Kompetisaun Kultura no Arte”.
Diretór CECA Profesór Vicente Paulino hatete, programa ne’e parte ida husi atividade CECA nian, tanba hakarak atu promove kompetisaun kultura no arte iha eskola sira, nune’e mós hametin amizade entre eskola no CECA-UNTL.
“Dala ruma ami ho ami de’it iha servisu fatin, entaun talentu ne’e defisil fahe ba ema seluk, ho razaun ida-ne’e mak ami mós hakarak promove liután talentu sira ba estudante seluk.
Programa ida-ne’e parte husi estensaun kulturál, liga ho servisu CECA-UNTL nian, tanba ne’e mak ami implementa programa ne’e ba eskola, nune’e bele promove Kultura no Arte iha eskola sira”, hatete Prof. Vicente, iha Colégio SAMARIA, Ainaro (16/06).
Iha fatin hanesan Diretór Eskola Católica SAMARIA Ainaro Pe. Eugenio R. M. Caunan Lafo, agradese ba ekipa husi CECA-UNTL no Sangar Santo António ho atividade ne’e bele koñese malu di’ak liután iha área servisu no ambiente eskola nian.
“Ami agradese tebes ba ita bo’ot sira-nia prezensa iha ami-nia le’et, maske atividade ne’e urjente loos, maibé ami kontente tebes tanba ita bele koñese malu, nune’e mós ami hatene CECA ho ninia knaar sira no ita bo’ot sira mós mai hatene ituan realidade moris ema Ainaro nian ho nia ambiente sira”, hatete Pe. Eugenio.
Atividade husi CECA-UNTL ne’e komesa 13 to’o 16 fulan Jullu 2024, ho atividade sira mak hanesan fahe koñesementu kona-ba múzika liga ba Coral, Solo Vokal, Drum Band no ikus taka ho kompetisaun Coral no Solo Vokal ba estudante sira iha CatólicaSAMARIA nian, atividade ne’e hetan partisipasaun másimu husi profesór no estudante sira eskola nian, inklui ekipa Korál UNTL nian.
Média UNTL 
: Agostinho da Cruz e Silva
: Agostinho da Cruz e SilvaFoto 
: Domingos Amaral & Denilson Barros
: Domingos Amaral & Denilson Barros