![451412150_122111873540385439_1473515731625160482_n.jpg](/images/451412150_122111873540385439_1473515731625160482_n.jpg)
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH, Ph.D, hamutuk ho sívitas akadémika UNTL partisipa iha komemorasaun loron Comissão Função Pública (CFP) nian ba dala X, ne’ebé hala’o iha Munisípiu Ainaro (15/07) ho tema "Hametin Unidade Tane aas Étika Profesionalizmu hodi serbí Povu no Nasaun".
Iha entrevista Magnífiku Reitór hato'o parabéns ba funsionáriu hotu iha Timor-Leste, liuliu funsionáriu UNTL tantu rejime jerál (funsionáriu) no espesial (dosente) no liuhusi loron espesial ne'e atu fanun funsionáriu sira bele hasa'e tan dedikasaun no responsabilidade ba estadu tuir idaidak nia knaar.
"Parabéns ba funsionáriu hotu iha Timor-Leste no parabéns ba Ekipa Korál UNTL nian ne'ebé hetan primeiru lugar iha kompetisaun korál CFP nian 2024, ne'e hanesan motivasaun di'ak ida, nune'e ba oin bele prepara di'ak liután nomós UNTL hetan konfiansa atu sai hanesan uma na'in ba selebrasaun aniversáriu CPF nian iha tinan 2029”, dehan Reitór iha kampu Merkadu Lama, Suku Ainaro, Postu Administrativu Ainaro Villa.
Iha fatin hanesan, reprezenta Primeiru-Ministru, S.E. Ministru Planeamentu Investimentu Estratéjiku, Gastão de Sousa, hato'o parabens ba funsionáriu públiku hotu iha Timor-Leste no IX governu prioritiza programa rua iha setór administrasaun públiku, konsolidasaun governativa no kombate korrupsaun.
"Desentralizasaun Administrasaun Públika atu haforsa partisipasaun demokrátika no dezenvolvimentu ekonómiku iha nível munisipál to'o rurál ba prestasaun servisu ho kualidade atu implementa polítika dezenvolvimentu ida ne'ebé hanesan ba ema hotu", dehan Ministru MPIE Sousa.
Entretantu Prezidenti Komisaun Funsaun Públika, Sr. Agostinho Letêncio de Deus, kongratula funsionáriu públiku hotu no ajente Administrasaun Públika ne’ebé kontribui ativu ba konstrusaun estadu hahu husi 2000 to'o agora.
"Parabéns ba ita bo'ot sira hotu ne'ebé servisu ona iha Administrasaun Públika, tanbá ne'e sai funsionáriu publiku la'os knaar atu asegura ita-nia moris no familia, maibé mós sai servidór públiku tenki partisipa ativa iha konstrusaun estadu hodi halo dezenvolvimentu ba nasaun ne'e nian", dehan Prezidente CFP.
Eventu refere organiza husi Ministério dos Combatentes da Libertação Nacional (MCLN) no Comissão Função Pública (CFP).
Partisipa husi, E.S. Ministru sira, Membru IX Governu, Autoridade Munisípiu, Autoridade Postu-Administrativu, Autoridade Lokál, Funsionáriu, Komunidade no Konvidadu sira.
Média UNTL
: Denilson Amandio Barros
![📝](https://static.xx.fbcdn.net/images/emoji.php/v9/tcc/1/16/1f4dd.png)
Foto
: Agostinho da Cruz no Domingos Amaral
![📷](https://static.xx.fbcdn.net/images/emoji.php/v9/t5d/1/16/1f4f7.png)