Universidade Nacional Timor Lorosa’e (UNTL) nia Profesór Dr. Ananias Barreto husi Faculdade Economia e Gestão (FEG) liuhusi Oratio Sapientia iha graduasaun UNTL nian ba dala XXX, iha Jinaziu (GMT), Díli (12/07) hateten, graduadu sira tenki dezempeña pápel profisionál ba dezenvolvimentu sustentável nasionál.
“Graduadu sai hanesan pilar fundamentál ba dezenvolvimentu sustentável nasaun nian, tanba ne’e ita bo’ot sira tenki dezempeña papél profisionál ba dezenvolvimentu sustentável liuhusi siénsia ne’ebé idadiak hetan hodi defende direitu komunidade nian.
Ba ita-boot sira hotu nu’udar Graduadu UNTL nian iha papél hodi proteje ekosistema no kontribui koñesimentu signifikativa ba sosiedade ida justa próspera no resilente”, dehan Profesór Ananias ho tema oratio “A formação dos graduados com excelência caracter e visão global são os promotores efetivos para o desenvolvimento sustentável nacional”.
Atual Visedekanu ba Asuntu Akadémika FEG nian ne’e, motiva graduadu sira atu aplika kapasidade profisionál liuhusi karakter étika responsabildade sosial no prátika analítiku hodi fó solusaun pozitiva ba dezafiu ne’ebé nasaun no mundu enfrenta.
“Graduadu ne’ebé kualifikadu manifesta kapasidade profisionál liuhusi konstrusaun karakter étika, responsábilidade sosial no prátika analítika hodi fó solusaun positiva ba problema no dezafiu ne’ebé mundu enfreta liuhusi hanoin inovativa, sai baze esensial no fundamental ba visaun global hodi dezenvolve kresimentu ekonómiku hodi promove justisa sosial no preserva meiu ambiente iha sosiedade no nasaun”, dehan.
Liuhusi diskursu oradór mós husu ba Ministériu Ensinu Superiór Siénsia no Kultura (MESSK) atu dezempeña pápel hodi apoiu universidade sira nune’e bele prepara liután futuru lider ho transformasaun oioin liuhusi formasaun akadémika hodi kontribui ba dezenvolvimentu nasionál.
Média UNTL 
: Mario Jonio M. Mendonça
: Mario Jonio M. MendonçaFoto 
: Ekipa DEMCOM & Estudante DCS
: Ekipa DEMCOM & Estudante DCS