Universidade Nacional Timor Lorosa’e (UNTL) realiza serimónia solene liuhusi graduasaun ba dala XXX ho tema “Graduados Com Excelência, Carácter e Visão Global São Promotores Efetivos do Desenvolvimento Sustentável Nacional” durante loron rua (11-12 Jullu 2024) ho totál graduadu rihun ida atus hitu, sanulu resin lima (1715), iha Jináziu GMT (Gedung Matahari Terbit), Díli.
Iha diakursu Magnífiku Reitór UNTL Profesór dr. João Soares Martins,MPH.Ph.D hatete, graduasaun hanesan marka importante ida ba estudante sira ne’ebé konklui ona sira-nia estudu iha Universidade no rekezitu hodi hetan Grau Akadémiku nune’e serbí ba família no komunidade.
“Ida-ne’e hanesan marka ida ba estudante atu ba iha Merkadu Profisionál, hodi bele koloka sira-nia konkista akadémika no koñesimentu atu servisu iha komunidade, iha nasaun hodi kontribui ba Dezenvolvimentu Sosiokulturál Timor-Leste nian”, dehan Reitór.
Reitór hatutan, Graduasaun la termina graduadu sira-nia relasaun ho universidade no nafatin iha relasaun di’ak nune’e odamatan universidade nafatin nakloke ba sira ne’ebé hakarak atu aprende tan.
Iha fatin hanesan Ministru Ensinu Superior Siénsia no Kultura S.E. José Honório da Costa Pereira Jerónimo, hatete, graduasaun selebra momentu importante tebes iha moris estudante sira-nian.
“Ohin hanesan momentu nakonu ho emosaun haksolok tebes ba graduadu sira, ba dirijente universidade, liuliu profesór sira, tanba sira dedika sira-nia aan tomak hodi ohin imi bele finaliza imi nia perkursu iha UNTL.
Vitoria ba realizasaun ida-ne’e partilla entre estudante, dosente, inan-aman no familia sira ne’ebé kontribui diretamente no indireita. Tanba ne’e MESSK husu ba imi hafoin remata imi-nia perkursu akadémika tenki iha responsabilidade defende ba naran di’ak Almamater no kontribui ba dezenvolvimentu sosiedade no nasaun”, dehan MESSK.
Partisipa iha sesaun gradusaun nian husi membru Governu, Membru Parlamentu, Sosiedade Sivíl, Korpu-diplomata, parseiru dezenvolvimentu universidade nian, estrutura universidade nian, dosente, funsionáriu inan-aman, graduadu no konvidadu sira.
Bele asesu foto graduasaun nian iha link tuir mai;
Média UNTL : Laurindo da Cruz Gomes
Foto : Artur Ramos/Jaimito