Universidade Nacional Timor Lorosa’e (UNTL) liuhusi Faculdade de Ciências Sociais, Departamento de Comunicação Social (DCS) nia estudante na’in-limanulu resin tolu (53) partisipa iha formasaun báziku operasaun kámera no foti imajen no vídeo, iha Laboratóriu Multimedia DCS nian, Kaikoli, Díli (1/07).
Diretor DCS nian, Mestre Roberto da Costa Pacheco hateten, formasaun ida-ne'e importante ba estudante sira atu nune'e bele tulun sira iha kareira liu-liu iha vida Jornalismu nian, liuliu operasaun kámera no foti imajen to’o produsaun video.
"Formasaun ne’e durante loron lima (1-5) tanba ne’e, ita bo'ot sira iha previlejiu bo'ot tebes hodi tuir formasaun ida-ne'e tanba, ita hetan iha aula laran maibé teoria mak barak liu, maibé imi estudante sira bele hetan iha formasaun ida-ne'e atu fundamenta liután prátika operasaun kámera no foti imajen to’o produsaun video.
Hanesan diretór husu ita bo'ot sira tenki partisipa no toma atensaun, tanba formasaun ne'e ajuda tebes ita bo'ot sira ba aban-bainrua bele aplika iha servisu ruma relasiona ho área Jornalizmu nian", dehan Diretór.
Iha sorin seluk Mestre Abilio Fonseca Soares nu’udar formador hateten, liuhusi foramasaun ida ne'e, estudante hirak ne'ebé tur iha banku universitariu iha potensialidade hodi aprende, no sira mós aprende teoria to'o iha prátika, kona-ba teknika oinsá bele kaer kamera no halo entrevista ba fonte sira iha terenu.
"Kria formasaun ne'e ho hanoin ida katak, estudante sira ne’ebé oras ne'e tur iha banku univeritariu iha potensialidade no iha talentu ne'ebé di'ak tebes hodi apriende tanba ne'e maka ami ne'ebé hetan oportunidade aprende iha rai liur (Sidney University of Tecnology) bele fahe fila-fali ami-nia esperiénsia ba sira.
Liuhosi formasaun ida-ne'e observa katak estudante sira iha vontade hakarak aprende hamutuk kona-ba oinsa bele hatene hodi utiliza Kámera Video Báziku nian atu nune'e bele ajuda estudante sira wainhira tun iha terenu hasoru fonte sira", dehan Formadór Soares.
Estudante Inocéncia M. Da Costa dehan konteúdu ne’ebé hetan relevante tebes liu-liu área Departamento Comunicação Sosial nian no bele tulun sira iha teknika utilizasaun kámera no halo entrevista.
"Ha'u hanesan estudante senti formasaun ne'e di'ak no relevante tebes liu-liu ba ami-nia área Departamento Comunicação Social nian, no tulun tebes ami iha tékniku uza kámera, monta kamera, foti Imajen no video, ko'alia ho ita-nia fonte sira iha terenu", hatutan Inocencia.
Media
: Elizita Fernandes (Estajiária)
: Elizita Fernandes (Estajiária)