![449686105_122174612402076902_5960995898134220762_n.jpg](/images/449686105_122174612402076902_5960995898134220762_n.jpg)
Universidade Nacional Timor Lorosa’e (UNTL), liuhusi Diresaun Nasionál Rekursus Humanus, nia Diretór Cancio Monteiro, hatete, partisipasaun feto nian iha universidade nasionál ne’ebé lidera kargu diresaun no xefia hamutuk 29 ho reprezenta 39,2% husi totál pozisaun 74.
“Iha UNTL, partisipasaun feto nian ba kargu xefia iha diresaun no departamentu sira, hamutuk 39,2% husi total 74 pozisaun (diretór jeral too xefe seksaun) ne’e feto mak lidera. Enkuantu mane hamutuk na’in-haatnulu resin ida (44) reprezenta 60,8%.
Haree ba dadu ne’e, hatudu prestasaun jéneru ba kargu xefia iha UNTL ne’e, hanesan indikasaun di’ak tebes, tanba feto sira mós bele asumi responsabilidade pur-meritu iha diresaun no departamentu sira”, Dehan Diretór iha Kampus Sentral UNTL nian, Díli (25/06).
Diretór hatete, baseia ba dadus tuir mapa pesoal ba tinan 2024-2025 nian rejistu partisipasaun feto ba iha kargu diresaun nasional nian lidera husi feto na’in-tolu (diresaun hamutuk sanulu resin tolu), no kargu xefia total hitunulu resin haat (74) husi ne’e partisipasaun feto nain 29 mak lidera hanesan xefe departamentu no xefe sesaun.
![449209900_122174612486076902_9200681881197952172_n.jpg](/images/449209900_122174612486076902_9200681881197952172_n.jpg)
Aleinde funsionáriu Diretór ne’e esplika, kargu xefia ne’ebé okupa husi dosente, hamutuk atus ida limanulu resin lima (155), no partisipasaun feto hamutuk limanulu resin haat (54) ne’e ekivale ho 35%.
Iha sorin seluk Xefe Departamentu Rejistu Alunos no Sistema Académico Matilde Reis hatete, nu’udar feto ida iha karreira ne’ebé asume hela kargu sente orgullu tebes, tanba ida-ne’e foin ba dahuluk manan ba vaga hodi lidera departamentu no iha mós hanoin katak to’o ona tempu atu oportunidade ba feto mós bele lidera.
‘’Hau Sente orgullu tebes, ba ha’u-nia aan rasik no ha’u mós hakarak enkoraza feto maluk sira seluk hodi hatudu ba katak, feto mós bele sai dirigente atu lidera iha diresaun no departamentu sira.
Ha’u husu ba feto maluk sira hotu kuandu ba iha opurtunidade atu kompete di’ak liu kompete no brani atu foti desizaun, tanba ita iha lei ne’ebé bele regula ita hotu nu’udar funsionáriu públiku’’, Dehan Sra Matilde.
Média UNTL
: Mario J. Mendonça
![📝](https://static.xx.fbcdn.net/images/emoji.php/v9/tcc/1/16/1f4dd.png)
Foto
: Domingos Amaral
![📷](https://static.xx.fbcdn.net/images/emoji.php/v9/t5d/1/16/1f4f7.png)