![449509325_122174312864076902_4328992321204870986_n.jpg](/images/449509325_122174312864076902_4328992321204870986_n.jpg)
Universidade Nacional Timor Lorosa'e (UNTL)nia estudante Aleixo Mendonça dos Reis deside fahe tempu ba tuir prosesu aprendisajen nomós fa'an sigarru iha dalan públiku hodi sustenta nesesidade estudu loroloron nian hodi la depende liubá inan-aman.
Aleixo Mendonça dos Reis nu’udar estudante ativu husi Departamento de Ensino Pré-Escolar Faculdade de Educação Artes e Humanidades (FEAH) haktuir, liuhusi fa'an sigarru kontribui ona ba nia nesesidade estudu loroloron nian.
"Dalaruma fahe tempu hodi ba tuir aula depois fila husi kampus mai kontinua fa'an fila fali sigaru iha estrada públiku no jardin sira tanba, liuhosi fa'an sigarru bele sustenta ona ba ha'u-nia nesesidade loroloron no bele selu rasik ha’u-nia eskola nomós bele hatene poupa osan ba sosa tan sigarru mai fa’an fali", dehan Aleixo, iha Jardim 2006, Kolmera, Díli (26/06).
![449383017_122174196458076902_529547547150232708_n.jpg](/images/449383017_122174196458076902_529547547150232708_n.jpg)
Aleinde ne’e Catarina da Silva Camões nu’udar estudante (UNTL) nia Faculdade de Ciências Sociais Departamento de Comunicação Social haktuir, liuhusi sigarru nia folin ne'ebé nia fa'an bele garante ba nia nesesidade loroloron no eskola nian.
"Ha'u nu’udar estudante la moe hodi buka osan liuhosi fa'an sigarru, desde 2022 hafoin ha'u tur iha banku universitariu iha Departamento de Comunicação Social, FCS-UNTL.
Ha'u desidi buka osan liuhusi fa'an sigarru, nune’e bele sustenta ha’u-nia nesesidade lorloron nian, no ha'u la depende liuba família, maibé ita rasik maka buka osan atu nunee bele print materia, selu transporte ba no mai, han nomós seluk tan", dehan Catarina.
Nia hatutan, hanesan estudante tenke hatene fahe tempu ba kampus tuir aula, buka moris rasik no fahe mós tempu ba estuda.
Média UNTL
: Dionisia Soares Martins (Estajiária)
![📝](https://static.xx.fbcdn.net/images/emoji.php/v9/tcc/1/16/1f4dd.png)
Foto
: Elizita Fernandes (Estajiária)
![📷](https://static.xx.fbcdn.net/images/emoji.php/v9/t5d/1/16/1f4f7.png)