Universidade Nacional Timor Lorosa’e (UNTL) liuhusi Estudante Hadomi Natureza (ESHANA) nia Koordenadór Henrique Bento Pereira, iha Kampus FEG nian, Díli (20/06) haktuir, tinan ne’e halo ona rekrutamentu ba membru sira husi fakuldade sanulu iha UNTL no estudante ne’ebé mai aplika hamutuk na’in-atus ida ruanulu (120) no sira ne’ebé admitidu hamutuk na’in-haatnulu resin sia (49).
“Dadaun ne’e ami iha ona planu atu fó formasaun ba membru foun sira ba iha área formasaun profesional hanesan servisu administrasaun nian no ko’alia iha oin oinsa atu sai lider ida nune’e mos fo treinamentu ba sira kada tinan”, dehan Henrique.
Henrique mós hatutan, atividade ne’ebé sei halo tuir planu anual ne’ebé iha mak sei halo jornada la’o ain husi Postu Administrativu Quelicai to’o iha Díli ho tipu halo pekiza no esplorsaun ba iha foho Matebian no Foho Taroman iha Munisípiu Covalima.
“Planu ne’ebé ami iha hanesan organizasaun ESHANA UNTL ami hakarak organizasaun ne’e buras liutan hodi sai sentru kadernizasaun ba estudante UNTL atu bele kaderniza sira-nian an hodi transforma sira-nia karakter no melloria sira-nia koñesimentu liuhusi atividade servisu voluntáriu no oinsa kuda sentidu nasionalismu no patriotizmu hodi servisu ho fuan ho laran no servisu ho domin ba ita nia rai”, dehan.
Koordenadór ne’e mós agradese ba Magnífiku Reitór no Gabinete Visereitóra Asuntu Estudantís bele aprova ona proposta organizasaun ESHANA ba universidade UNTL nune’e, espera ba oin bele nafatin hetan apoiu husi Universidade atu bele halo atividade nomós bele envolve estudante sira husi fakuldade hotu.
Sandra de sousa Ximenes membru ESHANA hatete, ESHANA hanesan organizasaun ne’ebé forma ema nia mentalidade liuhusi atividade sira hanesan jornada la’o ain atividade reflorestasaun, limpeza jerál no aprende oinsa elabora proposta.
“Benefísiu ne’ebé ami hetan husi atividade ESHANA nian, mak forma ami-nia mentalidade, atu lidera iha eventu bo’ot sira hanesan jornal la’o ain no semináriu sira no oinsa muda ami-nia hanoin atu soe lixu tuir nia fatin, nomós ami aprende atu halo karta ba proposta sira”, dehan estudante FEG ne’e.
Média UNTL 
: Eugenia de Jesus Guterres
: Eugenia de Jesus GuterresFoto
: Laurindo da Cruz
: Laurindo da Cruz