Universidade Nacional Timor Lorosa’e (UNTL) liuhusi Diresaun Nasional Reseitas (DNR) nia Diretór Mateus Amaral, iha Kampus Liceu UNTL nian, Díli (19/06), hatete Departamentu Gráfika UNTL nian halo atende ba enkaderna (Jilid) monografia estudante sira-nian kada loron, simu estudante na’in-ruanulu (20) no livru hamutuk ualunulu (80).
‘’Normalmente ami atende ba estudante sira husi fakuldade sanulu iha UNTL no ami la limite ba estudante sira atu mai enkaderna, depende ba estudante sira-nia monografia mai no kada loron estudante sira mai kuaze na’in 20 no livru sira ne’ebé ami prodús loron ida ami prodús livru hamutuk 80. Kuantidade ne’e diferente, tanba fakuldade balun husu prodús rua de’it, maibé iha fakuldade seluk iha haat ba leten”, dehan Diretór Amaral.
Diretór ne'e hatutan, atu mellora kondisaun no atendimentu iha gráfika nian ne’e, maka halo planu ba modernizasaun nia tenki hadia uluk infrastrutura hodi halo investimentu liuliu ba makina sira ne’ebé atu utiliza ba enkaderna ho volume boot no lalais .
“Ba oin ita planu ona sei hadia espasu servisu ida ne’ebé diak no modernu atu funsionáriu sira bele servisu ho di'ak liutan, tanba makina tesi papel ida de’it, ne’e mós difikulta servisu atendimentu nian.
Ami mós dalabarak hasoru difikuldade ida mak estudante sira mai husu atu enkaderna ho urjente tanba ne’e husu ba fakuldade sira atu bainhira estudante sira ezame hotu revizaun tenki tau mós atensaun ba iha data atu rejistu ba judisium, nune’e labele difikulta ba servisu sira”, dehan.
Aleinde atende servisu enkadernasaun monografia, Departamentu Gráfika mós esforsu iha futuru sei desenvolve tan atendimentu iha kada fakuldade sira atu bele imprimi no enkaderna estudante sira-nia traballu.
Média UNTL 
: Laurindo da Cruz Gomes
: Laurindo da Cruz GomesFoto
: Agostinho da Cruz e Silva
: Agostinho da Cruz e Silva