ESTUDANTE FCS-FADIR PARTISIPA IHA KONFERÉNSIA PÚBLIKA INTELIJÉNSIA ARTIFISIAL

 

Iha entrevista Dekanu FCS Profesór Dr. Alarico da Costa Ximenes, hatete, liuhusi konferénsia ne’e atu fahe informasaun ba estudante sira no aumenta estudante sira-nia koñesimentu kona-ba oinsa funsionamentu intelijénsia artifisial no responsabilidade sivíl.

 

“Iha Timor-Leste ita seidauk iha regra ou lei kona-ba intelijénsia artifisiál tan ne’e liuhusi konferénsia ne’e bele fahe informasaun ba públiku sira atu bele komprende funsionamentu intelijénsia artifisial ne’e, nune’e ajuda ita iha futuru atu bele utiliza dadus sira ho didiak atu nune’e ema la bele hatene privasidade ita-nian”, dehan Dekanu FCS.

 

Iha fatin hanesan oradora Profesora Auxiliar Dra. Isabel Mousinho de Figueiredo husi Universidade de Macau, hatete, mundu ohin loron hasoru problema intelijénsia artifisial iha mós oportunidade barak atu halo, maibé eziste mós perigu sira.

 

“Husu ba estudante sira atu estuda makas no kuriosidade atu aprende no aprende la’ós de’it atu konkista títulu lisensiadu, maibé kontinua nafatin estudu hodi komprende siénsia intelejénsia artifisial nune’e bele haklean koñesimentu”, tenik Isabel.

 

Iha fatin hanesan estudante husi Departamentu Sosiolojia, Ediana de Jesus da Costa, senti kontenti, tanba liuhusi konferénsia ne’e bele aprende no komprende tan kona-ba intelijénsia artifisial no responsabilidade sivíl.

 

“Ha’u espera liuhusi matéria ne’ebé mak ohin oradora fahe ne’e sai hanesan bukae ida ba ha’u no ha’u sei partilla fali informasaun ne’e ba kolega no komunidade sira kona-ba lalaok intelijénsia artifisial no responsabilidade sivil”, dehan Ediana.

Konferénsia refere organiza husi Sentru Estudu Avansadu no partisipa husi, Dekanu, Visedekanu, Diretor Sentru Avansadu, Profesór Apolinario Magno, Dosente, Funsionáriu no estudante sira.

 

Média UNTL : Mario Jonio Mendonça

Foto : Domingos Amaral