Universidade Nacional Timor Lorosa’e (UNTL) liuhusi Visereitoria ba Asuntu Pós-Graduasaun no Peskiza (PRPGP) realiza Semináriu Internasional ho tema “Promoção, Prevenção e Controlo das Doenças Raivas em Timor-Leste”, iha salaun Lalini Larigutu, CNE, Dili, (05/06) hodi partilla informasaun relasiona ho moras Raivas ne’ebé dadaun ne’e kontamina ona iha Timor-Leste.
Iha entrevista Reitór UNTL hatete, moras raivas hanesan dezafiu ida ba Timor-Leste, tanba ne’e iha semináriu refere bele fó hanoin ba malu atu bele kontrola territóriu tomak, nune'e ba oin Timor-Leste bele livre husi moras ne'e.
"Moras raivas ne’ebé dadaun ne’e iha ona Timor-Leste hanesan dezafiu ida ba nasaun tomak, tanba ne'e mak liuhusi semináriu ne'e ita tau hanoin hamutuk ne’ebé mak forte atu bele kontrola moras ne’e. Nune’e ita bele livre husi moras raivas refere, ita bele prevene nune’e ba oin mosu tan kazu hanesan ita preparadu ona atu trava nune'e labele kontamina ba ema seluk ka animál seluk”, tenik Reitór.
Reitór mos husu ba ba Governu presiza esforsu konjuntu liuliu Ministériu Saúde no Ministériu Agrikultura Pekuária, Peska no Floresta (MAPPF), tanba moras ne’e Jeonótiku ne’ebé transmiti husi animál ba ema.
Iha fatin hanesan Vise-Ministru Saúde Flavio Brandão Mendes de Araújo hatete, nia apresiza tebes ba eventu ne'e tanba eventu ne'e sensíbel ho situasaun ida ne'ebé mak Timor-Leste hasoru.
“Apresia tebes ba ha’u, tanba UNTL sensíbel duni ho problema ne’ebé mak ita hasoru, tanba ita foin hasoru moras rabies iha ita-nia rain, hatudu katak UNTL iha hanoin analítiku ne'ebé forsa tebes, krítiku tebes. Ho eventu ne’e ha’u fiar katak aprosimasaun hotu ne’ebé ita halo bele dezeñu ita-nia estratéjia hodi hasoru moras ida-ne’e”, hateten Vise Ministru Saúde.
Iha sorin seluk, Sekretáriu Estadu Pekuária S.E. José Vieira de Araújo, agradese ba UNTL ho apoiu husu PHD Australia iha Timor-Leste organiza semináru ne'e no parte MAPPF nian servisu makaas tun ba iha baze hodi halo prevensaun liuhusi halo vasinasaun anímal sira.
“Parte MAPPF liuhusi veterinária nian, ha’u agradese tebes ne’ebé lahamate sira-nia vontade, tanba ha’u vizita sira iha fatin barak ona, servisu makaas tebes ba to’o illa Ataúro no área rurál sira hodi halo vasinasaun ba animal sira, maibé ne’e mós tanba servisu hamutuk ho Minsitériu Saúde no parseiru sira hodi buka solusaun atu prevene moras refere”, hateten.
Semináriu ne'e organiza, tanba servisu hamutuk entre UNTL liuhusi Visereitór ba Asuntu Pós-Graduasaun no Peskiza nia kursu Mestradu Medisina Tropikal no apoiu husi PHD no Ministériu Saúde.
Partisipa husi Embaxadora Australia iha Timor-Leste Caitlin Wilson, Visereitór, Diretór Nasionál, Membru Governu no estudante UNTL.
Média UNTL 
: Agostinho da Cruz e Silva
: Agostinho da Cruz e SilvaFoto 
: Domingos Amaral
: Domingos Amaral