UNTL HO PARSEIRU SIRA LANSA KURSU MESTRADU IHA ÁREA ENJEÑARIA

Escrito por Mateus Goncalves Visualizações: 171
444770331_122168909576076902_3482343998768791570_n.jpg
 
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH, Ph.D ho Visereitór ba Asuntu Pós Graduasaun no Peskisa (VRAPGP) hamutuk ho parseiru sira halo lansamentu ba kursu Mestradu iha área enjeñaria ne’ebé implementa husi Faculdade de Engenharia Ciência e Tecnologia (FECT) ne'ebé hetan apoiu husi JICA (Japan Internacional Cooperation Agency).
 
Iha lansamentu ne'e Reitór UNTL agradese ba JICA, tanba hili ona FECT sai parseiru hodi suporta makas iha área Edukasaun nian, liuliu área Enjeñaria, no husu ba profesór kondekoradu sira atu bele haree estudu mestradu ne'e bele la'o ho di'ak ba futuru.
 
"Ha'u hakarak hato'o agradesimentu ba JICA, tanba bele hili ona FECT sai parseiru ne'ebé di'ak hodi apoiu iha área edukasaun no tau importánsia ba edukasaun ne'e aas tebes.
Lori naran universidade nian, ha'u hakarak husu ba profesór kondekoradu sira atu haree didi'ak kursu mestradu ne'e bele la’o ho di’ak to'o susesu" dehan Reitór João iha Auditóriu FECT-Hera, Díli (28/05).
 
Iha fatin hanesan, reprezentante JICA nian iha Timor-Leste Sr. Keisuke Vjike hato'o parabéns ba estudante mestradu sira ne'ebé rejistu ona, no fiar katak estudante sira bele aproveita oportunidade ne'e hodi sustentabiliza dezenvolvimentu nasaun no UNTL nian iha futuru.
 
"Iha okaziaun ida-ne'e importante tebes atu hasa'e kapasidade ho sira-nian iha kursu nivel mestradu nian, tanba ne'e parabéns ba imi hotu, hein katak estudante mestradu sira bele aproveita didiak hodi sustentabiliza dezenvolvimentu UNTL no liuliu Timor-Leste nian", dehan Sr. Keisuke Vjike.
 
Total estudante ne'ebé rejistadu ba kursu mestradu ne'e hamutuk 29. Enkuantu programa ne'e implementa husi Visereitór ba Asuntu Pós-Graduasaun no Peskiza nian, Dr. Afonso de Almeida no apoiu husi Japan Internacional Cooperation Agency (JICA).
 
Partisipa iha lansamentu ne'e, reprezentante Ministru Ensinu Superior Siénsia no Kultura nian, Sra. Teresa Maria de Carvalho, reprezentante Embaxador Japaun nian, Yuki Sakai, Diretór Ezekutivu ANAAA nian, Sr. Nilton Paiva, Visereitór, Proreitór, Dekanu, Dosente no Funsionáriu sira
.
Média UNTL 📝: Leonia de Araújo da Costa
Foto 📷: Leonia de Araújo da Costa & Denilson A. Barros