Universidade Nacional Timor Lorosa’e (UNTL) nia Chefe Departamento de Corelação do Processo Disciplinar (DCPD) Sr. Quintino da Costa, iha nia kna’ar fatin Kampus Sentral, DÍli (22/05) hatete, planu prioridade haat mak sei implementa iha tinan oin hanesan, 1) Kontrolu servisu funsionáriu UNTL, 2) Disemina konduta étika no Estatutu Funsaun Públika nian, (3) Implementa regra prosesu disiplinar (4) Rekapitulasaun ba lista presensa husi departamentu no diresaun sira kada fulan.
“Departamentu iha planu prioridade haat, maibé tinan ne’e seidauk bele realiza, tanba departamentu foin eziste fulan tolu. Dadaun ne'e sei iha hela fase elaborasaun, tinan oin ita bele implementa, tanba ami-nia servisu atu haree ba disiplina funsionáriu sira-nian iha UNTL”, dehan Quintino.
Xefe Departamentu ne’e hatutan, departamentu prosesu disiplinar ezisti atu fó asisténsia no kontrulu servisu funsionáriu sira-nian no halo koordenasaun ho Komisaun Funsaun Públika atu halo kontrolu ba pontualidade funsionáriu sira-nian iha servisu hodi nune’e funsionáriu sira bele kumpri sira-nia dever no la’o tuir regra estatutu funsaun públika nian.
"Departamentu sei halo koordenasaun ho Komisaun Funsaun Públika atu bele fó dalan bainhira funsionáriu balun komete iregularidade iha servisu fatin, ita bele fo sansaun bazeia ba baze legal ne’ebé iha nomós desimina dekretu lei sira ne’ebé iha, ba funsionáriu públiku sira atu bele halo tuir. Espera katak iha tinan oin planu hirak ne’e sei implementa atu nune’e bele garante servisu funsionáriu sira-nian diak liután", tenik Xefe Quintino.
Média UNTL 
: Mario Jonio Mendonça
: Mario Jonio MendonçaFoto 
: Leonia de Araújo da Costa
: Leonia de Araújo da Costa