Universidade Nacional Timor Lorosa’e (UNT), liuhusi Centro Nacional Investigação Científica (CNIC) nia Diretór Profesór Dr. José Antonio Lourenço da Costa, hateten iha Kampus Kaikoli Díli (22/05), katak, planu prioridade tolu (3) ba tinan ida-ne’e; Peskiza, Konferénsia no Publikasaun.
“Planu prioridade ba tinan ida-ne’e, tuir planu ne’ebé CNIC halo ona foku ba programa tolu (3) hanesan, peskiza, Konferénsia no Publikasaun, maibé tuir baze orsamentu annual ne’ebé iha tinan ida ne’e ho cinco mil (5000) deit, tanba ne’e ita labele realiza peskiza no konferénsia boot ho natureza internasionál sira”, dehan Diretór CNIC.
Diretór mós hatutan, peskiza sira-ne’e la bele realiza, nune’e tinan ida-ne’e (2024) foka liu, ba de’it halo produsaun kona-ba peskiza, relatóriu sira nomós konferénsia nasionál sira.
“Tinan ida-ne’e foku liuba produsaun peskiza, relatoriu sira ne’ebé halo iha tinan kotuk nian. Agora ami halo publikasaun hamutuk sanulu resin ida (11) kona-ba Turizmu, Edukasaun no seluk tan no distribui ona ba fatin sira ne’ebé ami halo peskiza ba, maibé CNIC la iha peskizador nune’e peskizador sira ne’e mai husi fakuldade hitu (7) ne’ebé eziste iha UNTL inklui Turizmu maibé ami seidauk halo kontaktu ho sira ba peskiza tanba sira fakuldade foun”, dehan.
Diretór hatutan kada tinan CNIC sempre halo peskiza no konferénsia boot, maibé tinan ida ne’e redus oituan no halo deit konferénsia nasionál ho oradór nasionál ho internasionál sira balu, maibé ho dimensaun ne’ebé ki’ik halo deit iha oras ida no rua nia laran deit.
“Atividade ne’ebé halo iha tinan ne’e ho dimensaun kiik de’it. Nune’e la bele hasai despeza ne’ebé boot tanba la iha osan. CNIC sei organiza konferénsia ida iha fulan oin maibé iha hela faze preparasaun no koordenasaun ho parseru sira”, dehan.
