Universidade Nacional Timor Lorosa’e (UNTL) liuhusi Faculdade de Direito (FADIR) nia Dekanu Profesór José Tomas Alves, iha nia knaar fatin Kampus Sentral, Dili (15/05) hatete, planu prioridade ba FADIR nian ba 2024 nian, iha prioridade tolu (3) hanesan, kontratasaun Profesór, Fornese kursu mestradu, usa sistema SIA (Sistema Informasaun Akadémika).
“Ha’u foin asumi knaar nu'udar dekanu fulan ida, tanba ne’e ha’u ezekuta de’it dekanu sesante nian planu, tanba ne’e ha’u haree planu prioridade tolu mak sai importante atu implementa hanesan, 1) kontratasaun ba profesór sira, 2) fornese kursu mestradu ba profesór lisensiadu sira iha rai laran no rai liur, 3) uza sitema SIA atu la bele prejudika ba publikasaun notas estudante sira nian” Dehan Dekanu.
Dekanu hatutan, fakuldade mós planu atu halo kontratasaun ba profesór internasional sira hodi eleva diak liután kualidade fakuldade nian, inklui planu sira seluk no espera tinan oin universidade bele aloka orsamentu nune’e funsionamentu fakuldade nian bele di’ak liután iha futuru.
