Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, hamutuk ho estrutura no sívitas akadémika presta omenajen ba matebian Olegario Sanches (funsionáriu iha Diresaun Nasionál Pagamentu Propinas-DNPP-UNTL), ne’ebé termina nia jornada moris iha 13 Maiu 2024, iha HNGV, Díli.
Iha rezidénsia matebian nian, Aimutin Díli (13/05), Reitór UNTL nian lori sívitas akadémika universidade nian, hato’o sentidu kondelénsia ba família liuliu ba matebian durante ne’e dedika nian an ba universidade ne’ebé servisu ho disiplina tebes.
“La’ós família de’it mak sente triste, maibé UNTL no ami mós sente triste, tanba lakon ona ami-nia funsionáriu di’ak ida ne’ebé durante ne’e dedika nia an tomak no tau interese aas liuba nia servisu iha universidade ho displina tebes”, dehan Reitór.
Reitór mós husu ba família matebian nia kaben no oan sira atu forsa nafatin, tanba la’os ema mak hakarak, maibé buat hotu planu Maromak Nian, ema hotu hasa’e orasaun nune’e matebian nia klamar bele hetan naroman.
Olegario Sanches moris iha Alas Same 15 outubru 1976, hakotu nia peregrinasaun moris iha Ospital Nasional Guido Valadares iha 13 Maiu 2024, ho idade 48. Matebian nu’udar funsionáriu iha Diresaun Nasional Pagamentu Propinas.
Média UNTL 
: Domingos Amaral
: Domingos AmaralFoto 
: Domingos Amaral
: Domingos Amaral