Universidade Nacional Timor Lorosa’e (UNTL) nia Faculdade de Medicina Ciência da Saúde (FMCS) realiza Judisium no Juramentu Profissional ba finalista hamutuk atus-rua sianulu resin ida (291), ho tema “Produzir Profissionais da Saúde Competentes, Adaptáveis, Criativos e Sívicos para Garantia o Direito a Qualidade Serviços de Saúde”, iha Salaun Oka, Surikmas, Díli (9/04).
Iha diskursu reprezentante Reitór, Profesór Dr. Samuel Venâncio de Souza Freitas atual Visereitór ba Asuntu Akadémiku no Garantia Kualidade, hato’o parabéns ba finalista sira hotu no kongratula ba FMCS, tanba bele produz rekursus kualifikadu hamutuk na’in 291, hodi tripla misaun liuhusi rekursu humanu ne’ebé kualifikadu hodi servi nasaun.
“Parabens ba finalista sira hotu no kongratula ba estrutura FMCS nian no juramentu ne’e la’os promesa, tanba juramentu ne’ebé ohin imi halo hanesan vinkulu ne’ebé mak servisu ba umanidade rai segredu no valoriza vida ema hotu nian”, dehan Visereitór.
Iha fatin hanesan Dekana FMCS nian Profesora Lídia Gomes, hato’o parabéns ba finalista sira hotu ba loron importanmte ida ne’e, liuhusi idaidak nia dedikasaun esforsu luta to’o finaliza jornada akadémiku no atinje mehi bele sai profissionál saúde.
“Juramentu profissionál ne’e bele ona tau iha prátika, liuhusi koñesimentu no abilidade étika ne’ebé imi iha hodi serbí komunidade ho integridade no sensibiliade. Imi sai ona hanesan alumni UNTL, nian nafatin hamorin almamater UNTL, hatudu nafatin responsabilidade profissionál iha imi-nia servisu fatin”, tenik Dekana.
Totál finalista FMCS 291 ne’e, kompostu husi departamentu ha’at, hanesan, Medicina Jeral hamutuk na’in (45), Farmacia (161), Nutrição e Dietética (63) no Departamento de Ciências Biomédicas Laboratoriais (81).
Partisipa iha serimónia judisium ne’e Sekretáriu Estadu Komunikasaun Sosial (SECOMS), Expedito Dias Ximenes, Diretór Ezekutivu ANAAA, Dr. Nilton Paiva Mau, Embaxadora Cuba iha Timor-Leste, Grisel Alina Aldama Innis, Proreitór, Dekanu fakuldade sira, Vise-Dekanu, Dosente, Funsionáriu, Konvidadu, Inan-Aman no Estudante sira.
Média UNTL 
: Mario J. Mendonça
: Mario J. MendonçaFoto 
: Domingo Amaral
: Domingo Amaral