Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, Mph, Ph.D, prezidi serimónia Isar-Bandeira iha semana dahuluk fulan Maiu nian, ne’ebé realiza iha Kampus Sentral, UNTL nian, Díli (6/04).
Iha diskursu Reitór hato’o parabéns ba Faculdade de Direito ne’ebé mak responsável ba atividade Isar-Bandeira liuhusi korpu isar-bandeira no korru.
“Ha’u husu ba estudante sira hotu atu aprende saida mak ita-nia inisiadór ba rai ida ne’e husik hela mai ita, mesmu diferente ideia, maibé ita buka atu rezolve ho maneira ne’ebé demokrátiku no respeitu direitus humanus no evita violensia, atu nune’e ita prense independensia ne’e ho diak” dehan Reitór.
Magnífiku Reitór mós konvida Sivitas Akadémika tomak atu iha fulan maiu ne’e hametin fiar liuhusi reza tersu tanba fulan Maiu ne’e fulan Na’in Feto nian.
“Fulan maiu ne’e fulan Na’in Feto nian, tanba ne’e husu ita hotu reza tersu hodi husu tulun no prezensa Maromak nian ita atividade hotu.
Ita mós selebra eventu importante ida maka semana da Língua Portuguesa Internasional, ita iha obrigasaun no responsabiliade hodi prátika, ne’e hanesan identidade kultural no identidade nasional Timor nian. Husu ita hotu atu pratika no konversa uza Língua Portuguesa iha resintu UNTL”, tenik Reitór.
Partisipa iha Isar-Bandeira ne’e Visereitór, Proreitór, Diretór Jeral, Diretór Nasional, Diretór Departamentu, Dekanu, Dosente, Funsionáriu no Estudante sira.
Média UNTL 
: Mario J. Mendonça & Domingos Amaral
: Mario J. Mendonça & Domingos AmaralFoto 
: Agustinho da Cruz
: Agustinho da Cruz