Universidade Nacional Timor Lorosa’e (UNTL) nia Visereitor para Asunto Académico e Garantia Qualidade (VRAAGQ) servisu hamutuk ho Departamento de Média e Comunicação (DEMCOM) realiza Debate Akadémiku ho tema ‘’UNTL À CONVERSA: Prazo de Conclusão dos Cursos na UNTL, Desafios e Solucões’’, ba Edisaun II nian iha Auditóriu, FECT Hera, Díli (30/04).
Iha diskursu Magnífiku Reitor Profesor dr. João Soares Martins,MPH.Ph.D hato’o agradese ba inisiativa husi VRAAGQ ho DEMCOM, tanba bele iha inisiativa atividade debate ida-ne’e hodi bele fó espasu hodi bele rona mós kona-ba saida mak estudante sira hato’o haree ba problema sira ne’ebé sira hasoru durante iha prosesu estudu.
‘’Ha’u hanoin dialogu ida-ne’e importante tebes hodi rona problema sira ne’ebé durante ne’e, estudante sira hasoru iha sira-nia prosesu estudu nian. Tanba ne’e husu mós ba dekanu sira atu anota hela ba informsaun sira husi estudante sira hodi ita bele deskute nune’e bele hadia iha futuru bele lao diak liu, nune’e estudante sira mós la estuda kleur liu iha UNTL’’, dehan Magnifiku Reitór.
Iha fatin hanesan, Visereitor para Asunto Académico e Garantia Qualidade (VRAAGQ) Professór Samuel Venâncio de Souza Freitas agradese ba fakuldade sira ne’ebé partisipa iha diskusaun ne’e diak tebes hodi hatan ba problema estudante sira nian.
“Liuhusi diskusaun ne’e, atu iha biban bele avalia iha fakuldade ida-idak hodi fó espasu atu bele resolve buat ruma iha fakuldade entre estudante ho dosente no estrutura sira.
Ohin segunda edisaun ita koalia kona-ba kualidade kursu no kualidade prosesu aprendizajen ba estudante sira hodi rona oinsa estudante sira-nia preokupasaun no bele hare mos kona-ba regulamentu akadémiku nian’’, dehan Profesór Samuel.
Partisipa iha diskusaun ne’e Visereitór, Proreitór, Dekanu, Visedekanu, no interlokutór sira husi Faculdade de Direito, Faculdade de Educação Artes e Humanidades (FEAH) no Faculdade Ciências Exatas (FCE), Senadu Estudantíl no estudante sira.
Média UNTL 
: Laurindo da Cruz Gomes
: Laurindo da Cruz GomesFoto 
: Eugenia de Jesus Guterres
: Eugenia de Jesus Guterres